Pansik silik dulu nyema bulih kereja di menua tasik — Anifah

Datuk Seri Anifah Aman

PAPAR, Jan 22: Menteri Luar Negeri Datuk Seri Anifah Aman ngelalau rayat menua tu ti bulih kereja di menua tasik ngambika minta penerang silik nyengkaum penenetap gawa di menua nya nengah kedutaan menua nya di Malaysia tauka Kedutaan Malaysia di menua nya.

Ku iya, nya beguna amat laban sida bisi nerima penerang ti madahka sekeda orang bisi muka peluang gawa seraya nemuai ngagai rayat Malaysia ngagai sekeda menua nyengkaum disemaya dibayar gaji ke mayuh.

“Pansik tumu beratika chara nya nipu lalu pekara ti dipadahka sida nya jauh ari realiti ti deka diasaika rayat Malaysia ke deka gawa di menua tasik.

“Nyema sesapa individu tama ngagai sebuah menua nadai permit tauka visa ti sah, nyengkaum permit ari menua bukai, opis bekuasa menua nya tau ngukum,” ku iya madah ngagai pemberita sepenembu program Kembali Ke Sekolah di Sekolah Rendah Jenis Kebangsaan Pei Yin, Membakut ditu empai lama.

Ku Anifah beru, Kedutaan Malaysia mega deka betapi enggau pemar meri bantu konsular ngagai rayat Malaysia ti ditemu gawa di menua tasik ke nadai permit ti sah.


“Pekara tu mega ke bendar tau ngamahka nama menua kitai. Nya kebuah, aku deka ngelalau semua ngambika bejejaga lalu nyeliahka pihak diri ari kena tipu nengah chara ke baka nya.

“Tetiap rayat Malaysia ke deka nemuai ngagai sesebuah menua deka nitihka pinta penama enggau undang-undang menua nya,” ku iya.

Ba pengerami nya, Anifah nyuaka bantu beg sekula ngagai 420 iku nembiak ari 14 buah sekula primari ngelingi Membakut. — DayakDaily

Share this article!