Program Agropreneur Muda meransang rebak baru ngaul diri ba pengawa betanam betupi moden

Palan pemandang Agropreneur Muda ke bisi dibuka ba Agrofest 2018.

KUCHING, Okt 28: Agropreuner Muda sebengkah program ti dipejalaika ari baruh Opis Menteri Betanam Betupi enggau Bumai, ti betuju meransang raban nembiak ngaul diri ba pengawa betanam betupi.

Program nya ti dipejalaika opis enggau ejensi ke ari baruh MOA ngembuan juluk ngunah pengawa betanam betupi nyadi sektor moden sereta dinamik lalu dipilih nyadi batang pengawa ti tau meri penatai pemisi ke besai ngagai rebak baru.

Nitihka padah siku pemesai ke nyaga palan pemandang Opis Betanam Betupi ba Agrofest 2018 ti diatur di Demak kemari, program Agroprenuer Muda nya mega meri awak ngagai rebak baru ke beumur entara 18 ngagai 40 taun ngepun sereta nitihka program latih teknikal ke diatur opis.,ejensi bekaul ngerembaika pengawa dagang ti bekaul enggau bidang betanam betupi.

Bisi lima batang tuju program tu digaga. Keterubah ngambika ulih ngemata sereta ngemudahka chara program enggau aktiviti opis,ejensi ke ari baruh MOA tauka peribit di dalam enggau di menua luar.

Kedua, ngubah peragam sereta matak pengerindu rebak baru ngagai sektor betanam betupi enggau bumai.

Ketiga, ngemansangka modul pakej dagang bepelasarka industri betanam betupi nitihka tipak enggau peneka rebak baru.

Keempat, ngemansangka Agropreneur Muda nengah chara meri latih, iring enggau serbis berunding sereta sukung teknikal, belanja enggau dagang nengah chara pakej.

Kepenudi endar, meri penatai pemisi ke besai ngagai raban Agroprenuer Muda.

Ku iya, program tu mega dikearap ulih ngadaka Agropreneur Muda ti progresif, ulih besemekih, kreatif, inovatif sereta bisi penatai pemisi ke besai.

Ungkup taun 2018 tu, program nya dibuka sepanjai taun ngagai raban nembiak ke bisi ati nyereta program nya, tang ungkup raun baru program nya deka dipejalaika nengah chara berenggat, ku iya.

Ku iya, ngagai orang ke mujur diterima nyereta program nya, projek ti dipejalaika sida deka dipatau ba timpuh tiga bulan keterubah, ke alai sida deka diberi lalau teknikal enggau latih.

Sida mega deka diberi bantu geran ari sukut perengka ke dikena lalu penyampau ti dikemendar bepelasarka bansa projek ti dipejalaika sida, ku iya.

Ngagai rebak baru ke bisi ati nyereta program tu, tau ngulihka penerang silik ari opis enggau ejensi ti udah diberitanggung pengawa bejalaika pprogram tu tauka datai terus ngagai Opis betanam Betupi. — DayakDaily