KUCHING, Okt 28: Bengkel ngaga Sugu Tinggi enggau Kain Buriek ke diatur ke diatur Louis Weslly Enterprise, Usahawan Perbadanan Kemajuan Kraftangan Malaysia, Pampang Sarawak kemari, udah nerima sambut ke manah.
Bengkel nya udah diatur ba premis Louis Wesley Enterprise empu ke berengkah ari pukul 9 pagi nyentuk 5 lemai.
Ku Louis, bengkel ke diatur kemari iya nya Siri Ke-9, dikena bekunsi penemu enggau semua orang ke bisi pengerindu ngaga asil pengelandik jari nya ngambika nemu ngaga rengka ngepan Iban.
Bengkel tu keterubah semina nagit penatai 20 iku pesereta aja, ngambika ngemudahka proses ngajar sereta ngaga kereban nya, ku iya.
Maya bengkel nya, pesereta udah dibagi ngagai dua kategori iya ngaga Sugu Tinggi ti dipasuk 11 iku ke diajar Louis empu enggau Kain Buriek ti disereta 8 iku ti diajar Kamsiah Anak Anal.
Ku Louis, diatu sugu tinggi tu ukai semina digaga nyadika rengka pengias aja tang mega tau meri penatai pemisi ke manah ngagai orang ti bisi pengerindu ngaga kereban nya.
Pengawa ngaga sugu tinggi enggau kain buriek tu manah dikereja raban orang indu kelebih ngagai raban indai tunggal, laban nya ulih digaga di rumah diri, ke tau dikena ngulihka penatai pemisi sereta ngelempungka tating belanja dalam ruang bilik, ku Louis ti udah muka Louis Welly Enterprise urung setaun lebih ke udah.
Ungkup bengkel ti dipejalaika kemari, pesereta ke ngulu bengkel nya ukai semina datai ari mengeri Kuching tu aja, tang bisi mega datai ari bagi menua bukai baka Kapit, Kanowit enggau Bintulu.
Louis mega madah,bengkel ke sebaka mega deka dipejalaika ba bagi menua bukai di serata Sarawak. — DayakDaily
