KUCHING: Presiden Indonesia Joko Widodo tauka mega dikelala enggau nama Jokowi disadang bisi ditu kena 20 enggau 21 November ketegal dikangau Menteri Besai Datuk Seri Najib Razak.
Nentuka pekara nya ngagai media ditu empai lama udah, Konsul Jeneral Indonesia di Kuching Jahar Gultom madah, Jokowi deka datai kitu ngulu aum Perundingan Tahunan Malaysia-Indonesia, kelimpah ngulu Forum Ekonomi Islam Sedunia (WIFE) ke deka diatur ba Palan Konvensyen Borneo Kuching (BCCK).
Entara isu ti dipelabaka dikerandau kedua-dua ketuai menua nya sentang chukai jalai ba pintu penama ba garis entara menua entara Kalimantan Barat (Kalbar) enggau Sarawak.
“Presiden Jokowi swka mutarka isu chukai jalai ba pintu penama garis entara menua lalu nya deka dikerandau lebuh ke betemu enggau Menteri Besai Malaysia,” ku iya madah ngagai pemberita.
Pintu penama nya beguna amat laban penyampau rayat kedua-dua menua nya signifikan.
Ku Jahar, kerejasama sereta setuju penemu antara Jakarta enggau Putrajaya besai amat reti laban atur, memorandum pemereti ati, sereta pemereti ba pekara nya sigi udah bisi.
Ku iya, pemutus kedua-dua ketuai menua nya beguna amat dikena nentuka pengelikun enggau pengelantang rayat tama ngagai kedua-dua menua.
Lebuh ke ditu Konsul Jeneral nya baru, Jokowi mega dipelaba berandau enggau 5,000 iku peranak Indonesia ke bisi di Sarawak.
