Tejuka bala ketuai BN milih chalun ungkup PRU14

Dato Sri Wong Soon Koh

KUCHING, Okt 25: Presiden Parti Rakyat Bersatu (UPP) Datuk Seri Wong Soon Koh minta bala ketuai enggau penyukung Parti Rakyat Bersatu Sarawak (SUPP) nejuka bala ketuai Barisan Nasional nentuka chalun ba pengawa bepilih besai tu ila

“Kitai anang belaya sapa empu chalun ke ulih menang. Serah aja ngagai ketuai BN ngambika ngaga pemutus,” ku iya madah ngagai pemberita pengydah ngelancharka GDex e-Commerce Hub and Linehaul di Jalai Batu Kitang, kemari.

Wong ke mega Menteri Wang Kedua sereta Menteri Dagang Entarabangsa enggau e-Dagang Sarawak ngakun parti iya udah nganjung rintai nama chalun ungkup pengawa bepilih besai ngagai Menteri Besai Datuk Seri Najib Tun Razak enggau Kepala Menteri Datuk Patinggi Abang Johari Tun Openg ngambika diperunding.

“Kami pechaya chalun-chalun kami ulih menang lalu kami ngarapka sida diakun lalu diperundingka,” ku iya tang enggai madahka penyampau kerusi ke ditagit UPP enggau penyampau chalun ba rintai nya.

Status UPP unik laban ukai sebagi ari parti komponen BN tang bala ketuai parti nya mangku pengawa besai dalam Kabinet negeri enggau perintah kandang menua.


UPP ke mega repik parti SUPP nadai Kaban Parlimen tang SUPP bisi wakil tunggal iya nya Datuk Seri Richard Riot, ti mega nyadi sapit presiden parti sereta Menteri Pengatur Pengereja Pengawa.

Presiden SUPP Datuk Dr Sim Kui Hian baru-baru itu madahka parti nya udah dikemendarka perintah besai nudukka chalun ba tujuh kerusi Parlimen ti diungkup ngagai parti nya. — DayakDaily