PETALING JAYA, Jun 26: Parti Pribumi Bersatu Malaysia (PPBM) merambu deka ngerembaika sayap ke Sarawak dikena ngisi pinta rayat negeri nya ti dekaka parti nya didudukka di negeri.
Menteri Besai ke mega Chairman PPBM Tun Dr Mahathir Mohamad madahka singkang nya senipak enggau gaya ke nyadi di negeri nya ke alai parti-parti politik dalam Pakatan Harapan baka PKR enggau Amanah udah bisi di negeri nya kelimpah parti PAS.
Taja pia, iya madahka PPBM enda ke Sabah, laban negeri nya udah bisi Parti Warisan Sabah ke dianggap nyadi parti bakih PPBM enggau Pakatan Harapan.
“Diatu, di Sarawak din semua parti Sarawak ngaga gempung kediri. Nya alai, laban PKR udah bisi din, Amanah udah din, lalu PAS pan bisi din, nya kebuah kami bepikir sigi patut kami (PPBM) kin,” ku iya dalam aum media pengudah nyadi chairman Kaunsil Ketuai Tetinggi PPBM ditu kemari.
Berebak enggau nya, Dr Mahathir madahka PPBM nerima mayuh pinta ari kaban UMNO ke deka nyadi kaban parti nya. — DayakDaily
