KUCHING, Nov 13: Presiden PBDS Baru (PBDSB), Cobbold John madahka isu Tanah Adat Bansa Asal (NCR) napi pemar diputarka bepun ari agenda Politik Pemansang ke ditengkebang Tun Pehin Sri Abdul Taib Mahmud dulu suba.
Ku iya, penemu Politik Pemansang Taib tu enda engkeman laban ngenuluka pemansang tang enda ngira adat asal sereta daya idup sesebengkah bansa enggau pengerusak rampa menua.
Diatu, parti tu direjista baru lalu deka nampung agenda PBDSB ngetan sereta bejakuka ungkup Dayak ba menua Sarawak, ku Cobbold.
“Di Sarawak, parti politik ti pemadu bekuasa iya nya BN-PBB. Strategi PBB tu tadi nengah sistem birokrasi ke alai sida ngambi dua bengkah bagi jalai melitikka tanah.
“Ke satu, kitai Dayak ti diau di menua pesisir dipadahka sida seranta lalu begunaka pemansang ari perintah dikena ngangkatka tikas jalai pengidup.
“Kedua, sida mai bala Dayak nuju “pemansang” dikena napi ubah dunya globalisasi. Tang semua tu enda nyadi nyata laban BN-PBB Taib rambau tu ngemeranka ulah kroni politik,” ko Cobbold nerang.
Cobbold madah, Sarawak tu menua ti benung angkat mansang lalu begunaka sistem ekonomi ti entap ngerembai.
Ku iya, tu meh kebuah NCR dikalihka nyadi komoditi betanamka sawit bedandang besai.
Ari nya ku Cobbold, modus operandi perintah BN numbuhka kompeni Kunsi ke alai dagang begulai entara pengempu tanah enggau kompeni. Ba ditu, 30 peratus ungkup pengempu tanah, 60 peratus enggi kompeni lalu 10 peratus dichukai Perintah BN.
“Nya meh kebuah, Kod Tanah Nengeri (SLC) diubah ba taun 2000 suba lalu Seksyen 5 (2) (f) dikinsil. Tuju ubah tu semina dikena nyapai juluk ati Perintah BN Sarawak ngambi tanah tu nyadi tanah perintah ke dikumbai “state land”.
Cobbold madah, polisi politik pemansang tu meri penyaru ngagai Bansa Dayak.
“Pekara tu bepun ari sapa ti patut ngempu hak ekslusif ba tanah sekalika rayat tauka perintah?” tanya Cobbold.
“Nya alai, PBDS mngekang nyebut Tanah Adat Bansal (NCR) patut disukat nengah Seksyen 18 Kod Tanah Nengeri ngambika pengempu tanah diberi hak ekslusif. Tang perintah Barisan Nasional agi majakka Seksyen 6 laban dikena bejalaika politik pemansang ti ditengkebang Taib”, ku Cobbold nyemetak.
Nampung nya baru, Cobbold mega madahka kompeni deka diberi Provisional Lease (PL) lalu nyadi pemegai lisin sepengelama 60 taun sereta pengempu tanah diberi “certificates of title” pengudah tanah sida direjista ba bank.
Tang pekara tu suah nyadi ke penyarut laban mayuh kes ke alai kompeni muka ladang komoditi sawit ngerampit tanah ti enda dibungkur dalam PL.
“Batang tanya mensia mayuh ngagai perintah nengeri, sekalika bungkur kuasa “certificates of title” ulih ke jamin hak ekslusif pengempu tanah diberi ke rayat?”, ku tanya Cobbold.
“Kebuah aku betanya laban mayuh penyarut ti nyadi ari agenda politik pemansang Taib tu ke dipechara ba kort ke alai kompeni beambi ulih sereta nguna apek bayat ngemba bala pengempu tanah”, ku Cobbold.
“Kami pan suah ninga sebana rayat ke alai ketuai komuniti bejualka menua sereta nerima gaji ari kompeni. Tu ngujungka penyarut lalu perintah nengeri dipinta meri pemerat ba pekara tu”, ku Cobbold.
“Ba krisis tu kitai ulih meda ketuai Bansa Dayak dalam Barisan Nasional dipeda baka enda ibuhka penusah ti ditapi rayat”.
“Bansa Dayak ke dudi ari ila nyangka tau disemaka ngampar sebelah pasar ketegal ti nadai menua agi laban menua asal ti udah diambi alai ngemansangka ladang sawit.
“Kitai Dayak diatu nyau baka temuai sereta bekuli ba tanah diri empu ketegal kena teruju politik pemansang tu”, ku Cobbold. — DayakDaily
