SIBU, Jun 22: PKR Kanowit, Lanang enggau Sibu sehari tu udah ngaga ripot ngagai Opis Nagang Makai Suap Malaysia (SPRM) bekaul duit turu RM50 juta ari perintah besai sebedau tu ti dikemendarka dikena ngaga Jalai Nanga Ngungun-Nanga Jagau di Kanowit ke panjai 22km.
Ungkup belanja nya dibantaika ex-Menteri Besai Datuk Seri Najib Tun Razak maya kimpin pengawa bepilih besai negeri di Rumah Taboh, Skim Pengentap Baru Rascom di Nanga Ngungun kena Mac 27, 2016.
Sekretari PKR Kanowit George Chen madah, taja pan agih nya udah dikemendar, tang jalai nya empai berengkah digaga.
“Kami rayat Sarawak, deka nemu dini duit ya diatu, sekalika duit nya udah diberi tauka dirampas raban politik ke pemansang ba endur bukai,” ku iya madah ngagai pemberita pengudah ngaga ripot ba opis SPRM di Wisma Persekutuan ditu sehari tu.
Ku iya, pengerami nasih tanah ngaga projek jalai nya udah digaga tiga kali iya nya ba taun 2012, 2014 dan 2016. — DayakDaily
