PKPP: Pemindah entara pelilih menua dikemendar, ku Uggah

Datuk Amar Douglas Uggah Embas

KUCHING, Jun 9: Pemindah entara pelilih menua dikemendar berengkah ila alai peranak ari negeri bukai mega dikemendar tama ke Sarawak, ku Sapit Kepala Menteri Datuk Amar Douglas Uggah Embas.

Iya ke mega Chairman Komiti Pengintu Penusah Ngenyit Negeri Sarawak (JPBNS) madah, pemendar nya seraris enggau penetap Perintah Besai bekaul Perintah Tagang Pemindah ‘Pemulihan’ (PKPP) ti diterit berengkah 10 Jun ngagai 31 Ogos.

“Sebedau tu di Sarawak, pemindah entara pelilih menua begunaka permit ari polis lalu pia mega pemindah ari siti negeri ngagai siti negeri. Sida ke ari Kuala Lumpur meseti ngulihka permit ari polis enggau komiti.

“Tang berengkah ila, semua peranak Malaysia ari Semenanjung Malaysia, Sabah enggau Labuan tau tama ke Sarawak.

“Pia mega enti sida ti deka mindah ari Kuching ke Samarahan tauka Serian tauka pelilih bukai, enda begunaka permit agi,” ku iya ba aum pengarang berita bekaul Covid-19 sehari tu.

Tajapia tambah Uggah, sida ari Semenanjung Malaysia, Sabah enggau Labuan meseti nitihka SOP iya nya ngisi aplikasyen MySejahtera ba telefon pintar sereta ngisi pom deklerasyen pengerai.

Kelimpah ari nya, temuai mega dipinta ngambi chunto PCR pengudah sangkai di pintu penama negeri sekalika nengah darat, langit enggau tasik enggau nguna apliksyen COVID Trace Sarawak sereta Qmunity.

Tambah Uggah, semua peranak Sarawak ke pulai ari menua luar mega meseti dikuarantin pengelama 14 hari di hotel alai ungkus kuarantin deka ditanggung Perintah Negeri sereta diambi chunto Covid-19 ba hari ke-10.

Ungkup peranak menua luar ke tama nguna permit kereja enggau visa nyengkaum penyereta Program Malaysia Rumah KeduaKu (MM2H) ku Uggah, sida mega meseti dikuarantin 14 hari tang ungkus hotel dibayar sida empu.

“Semua orang ke dipantau (PUS) ke dikuarantin di hotel nyentukka sehari tu meseti ngabiska tempuh kuarantin,” ku Uggah. — DayakDaily