KUCHING, Okt 19: Pekit main bol ngerebut Piala ADUN N30 Balai Ringin diatur ba taun 2019, ku Menteri Muda Nembiak enggau Lumba Datuk Snowdan Lawan
Iya ke mega Kaban Kunsil Negeri (ADUN) Balai Ringin, madah pekit nya tau dipasuk semua nembiak di DUN Balai Ringin ti rinduka main nya.
“Raban nembiak ke ngembuan pengelandik tinggi ba pekit nya ila deka diasur bepilih ngarika Kuching FC,” ku Snowdan.
Iya mansutka jaku nya rambau bejadi Pekit Main Bol Gerempung Apai Indai enggau Pengajar (PTA) SK Padang Pedalai, Simunjan ba tengan minggu tu tadi.
Ba pengerami nya, iya muji pengawa PTA SK Pedalai ti regas ngatur pekit lumba enggau main.
Ku iya, pekit ke baka nya ulih nyaup ngerapitka kaul entara sida ke diau di kandang endur ngelingi Balai Ringin.
Kelimpah ari nya ku iya, pengawa ke diatur nyaup ngenataika pemisi belanja ngagai sekeda orang dagang ti bisi muka bangsal bejual pemakai enggau ai irup.
“Pekit ke diatur matak mayuh orang datai, alai kitai sama bela beperindang seraya betemu enggau kaling lama,” ku iya.
Ngenang kaul bukai, Snowdan ba pengerami nya mega madah deka mantu pinta gerempung ngaga siti balai besai enggau ngemanah panggau sekula ke diatu ti udah balat repuk.
Ijinsi ke bekait ku iya deka ditesau enggau lengkas ngambi ulih beratika pekara nya enggau silik.
Dulu agi ari nya, chairman PTA SK Padang Pedalai, kaunselar Mini, ba jaku pengelalu, ngenataika jaku puji ngagai Snowdan ti udah datai bejadi pengawa kelimpah ti udah ngagihka geran penyampau RM10,000 dikena komiti ngatur pekit.
Bela datai kepala pengajar (GB) SK Pedalai, Pengajar Ramlan, GB SK Sg Pinang Pengajar Jamaiah enggau Pengulu Pelie. — DayakDaily
