PH Sarawak chukup pechaya ulih ngalahka GPS ba Pengawa Bepilih Negeri ke deka datai

Chong (semilan kiba) begambar enggau raban ketuai DAP Sarawak di Kuching. Anthony (lapan kiba).

KUCHING, Nov 4: Parti Tindakan Demokratik (DAP) Sarawak nengah gempung parti bukai dalam Pakatan Harapan (PH) sedia ngalahka Gabungan Parti Sarawak (GPS) dalam timpuh kurang ari 3 taun ti deka datai.

Chairman PH Sarawak Chong Chieng Jen madah, PH diatu ba penuduk ke pemadu manah numbuhka perintah di Sarawak pengudah pemujur ba Pengawa Bepilih Besai Ke-14 (PRU14).

Ba PRU14 ku Chong, DAP Sarawak menang ba 6 penuduk Parlimen alai DAP nguasa 42 sitak Parlimen di serata menua.

“Diatu kitai nyikap diri dikena napi Pengawa Bepilih Negeri(PRN) ti disadang diatur dalam timpuh kurang ari 3 taun.

“Seraya GPS enggau Abang Johari (Kepala Menteri Datuk Patinggi Abang Johari Tun Openg) ngelaban nengah sukung raban Najib ke dulu, kitai (DAP) meseti meratka akauntabiliti, lurus enggau tusun perintah ke adil.

“Abang Johari enda nyemaka (Pehin Sri) Adenan Satem. Enti Adenan Satem meri peranak Sarawak pengarap, Abang Johari semina meri ‘hot air’ aja,” ku Chong.

Chong ke mega Chairman DAP Sarawak mansutka jaku nya rambau Aum ‘Biasa’ DAP Sarawak Ke 18 di Kuching seharitu.

Aum nya dipenyadi Ketuai Renggat Tinggi DAP Menua ke mega Menteri Pengangkut Anthony Loke.

Ba aum nya, raban deligit milih komiti DAP Negeri ke baru ungkup timpuh 3 taun.

Chong ngelalau raban deligit milih komiti enggau pintar ketegal raban ketuai ke dipilih nya deka nguluka parti napi PRN.

Ngenang kaul ke sama, Anthony ba jaku bejadi aum madah diri pechaya PH ulih ngerampas Sarawak ari GPS ba PRN ti deka datai.

Ku iya, diatu PH udah nguasa Perintah Besai lalu ngembuan pengelebih ditambah agi ba pemujur menang 6 sitak parlimen di Sarawak tembu PRU14 kena Mei 9, 2018.

“Tajapia kitai enda sengapa ngena tauka beambi ulih ari aset ke dikembuan Perintah Besai.

“Ke pemadu berat, dalam kurang tiga taun tu kitai meseti gawa enggau chakah lalu matak ati rayat Sarawak ngambika rinduka kitai,”ku iya.

Anthony nambah, enti Sarawak mujur dikuasa PH, mayuh agi program pemansang ungkup pemaik peranak nengeri tu deka digaga. — DayakDaily