KUCHING, Mac 24: Perintah nengah Kerajaan Lembaga Pelesenan Kenderaan Perdagangan (LPKP) semampai ngiga chara ke pemadu manah dikena negapka industri teksi di negeri tu.
Menteri ba Opis Menteri Besai, Datuk Seri Nancy Shukri madahka pansik komprehensif digaga ngambika servis teksi mengkang relevan setipak enggau servis bukai ti bisi disediaka diatu.
“Berebak enggau nya, Bengkel Transformasi Industri Teksi di Sarawak ke taun 2018 udah diatur endur ngenataika polisi enggau atur ke diatu bekaul enggau industri teksi,” ku iya lebuh bejaku ba Pengerami Ngelancharka Bup Log Deriba Bas BIMP-EAGA Renggat Negeri Sarawak ditu kemari.
Ku iya, bengkel nya mungkur kerejasama enggau mayuh bengkah ejensi perintah nyengkaum opis bekuasa menua sereta gerempung teksi Sarawak ke mungkur 30 iku pesereta.
Ku iya, nengah bengkel nya mega deka ngiga inisiatif ngiri pemereti ngagai bala deriba teksi di negeri tu sentang sistem e-Hailing. — DayakDaily
