PUTRAJAYA, Jun 16: Perintah Pakatan Harapan deka terus nguji ngamatka semua semaya dalam manifesto, ku Menteri Besai Tun Dr Mahathir Mohamad.
Ku iya, keterubah ngetuk Chukai Barang enggau Servis (GST) pengudah Pakatan Harapan (PH) menang ba pengawa bepilih besai kena Mei 9 tu tadi ngambika rayat ngasai pengidup ke manah agi.
“Nya kebuah itu kami deka meri terima kasih ngagai kita semua ke udah ngundi PH. Kami deka ngamatka semaya. ” Keterubah ngapuska GST. Kita mangkah aja, buai undang-undang ti kelalu balat nya. Diatu kitai deka ngasaika chara idup ke lantang agi,” ku iya lebuh ke bejaku ba mua mensia mayuh ke ngabang Hari Raya di Seri Perdana ditu kemari.
Dr Mahathir mega meri terima kasih ngagai rayat ti udah datai ngabang ngagai iya kemari.
Ba pengerami nya kemari, menteri besai sempat betabi enggau urung 55,000 temuai aja ke alai bisi urung 80,000 iku temuai datai ngabang kia kemari. — DayakDaily
