KUCHING, 7 Dis: Perintah Besai udah ngagihka belanja RM152.5 juta ngagai Perintah Sarawak ungkup program Skim Lun Rumah Panjai.
Sapit Menteri Pekara Wang II Mohd Shahar Abdullah madah, penyampau 8,915 pintu rumah panjai udah digaga sereta dikemanah nengah agih belanja nya naka ke diatu.
Ba taun 2020 ku iya, Opis Menteri Pekara Wang udah ngagihka RM10 juta ngagai Perintah Negeri ungkup program ke sama.
“Enti bisi kebuah nambahka agih belanja ungkup program Skim Lun Rumah Panjai jemah ila, pekara nya bepanggai ba penegap sereta pemisi belanja perintah besai,’ku iya ba aum Dewan Rakyat seharitu.
Iya mansutka jaku nya dikena nyaut tanya MP Betong Datuk Robert Lawson Chuat bekaul penyampau agih belanja ti udah dikemendar Perintah Besai ngagai Perintah Sarawak ungkup program nya ba taun tu.
Robert bela nanya sekalika perintah bisi perambu deka nambah agih belanja ketegal mayuh peminta udah dikenataika komuniti.
Mohd Shahar madah Perintah Besai mega ngelaluka pengawa enti Perintah Negeri sama bela ngeluarka belanja ungkup program skim lun nya.
“Tu ketegal pekara nya siti projek infrastruktur enggau pemansang sosioekonomi ti mulaika pemaik terus ngagai peranak Negeri Sarawak,” ku iya. — DayakDaily
