PANTU, Okt 25: Pemaik sekula di serata negeri tetap nyadi pekara ke dikemerat Perintah Negeri ke dikuasa Gabungan Parti Sarawak (GPS).
Menteri Muda Nembiak enggau Lumba Datuk Snowdan Lawan madah tajapan isu ke bekaul enggau sekula diintu Perintah Besai, Perintah Negeri enda ngelengkaka pia aja.
“Tajapan sekula diintu Perintah Besai, kitai di Sarawak(Perintah Negeri) tetap deka mantu sekula kitai.
“Kita anang irau, ba kami ke nyadi pengari rayat(yb), kami sigi enda deka ngelakka pia aja.
“Seagi sekula nya didiri ba tanah Sarawak, pemaik sekula deka nyadi tanggungpengawa kitai, alai kitai sigi keran deka ngatur enggau manah,’ku iya.
Snowdan mansutka jaku nya ba Program Merarau SK St Leo (M), Gayau, Pantu ke diatur di Balai Tebuka sekula ditu, lemai tadi.
Iya ke mega Kaban Kunsil Negeri (ADUN) Balai Ringin madah pemerat Sarawak ngintu pemaik sekula ketegal ti meretika sentang pemerat pekara pelajar ba nembiak.
Ku iya, Sarawak bisi penegap ba pekara wang ti tau dikena mantu sekula di nengeri tu.
“Munyika penerang ke dipansut Kepala Menteri Datuk Patinggi Abang Johari Tun Openg, enti Opis Menteri Pelajar Malaysia(KPM) nadai duit, kitai sanggup nyali penyampau RM1 biliun ngagai sida.
“Duit nya dikena mantu, enti sida(KPM) amat nadai duit,’ku iya.
Nambahka nya ku iya ke mega Ketuai Bagi Nembiak Parti Rakyat Sarawak(PRS), raban ADUN enggau MP bisi diberi agih belanja RM5 juta setaun nengah Program Ubah Menua Pesisir(RTP).
Ku iya, agih belanja nya tau mega dikena mantu sekula kelimpah dikena ngaga projek pemansang bukai baka ke ngemanah rumah panjai, ngaga jalai alun, jematan, balai mensia mayuh enggau perengka guna bukai.
Snowdan berasai gaga ketegal pengawa ngaga balai tebuka Sk St Leo(M) Gayau ke nyadi siti ari mayuh program iya udah tembu lalu meri pengelantang ngagai nembiak sereta pengajar.
Berindik enggau nya iya nesau bala apai indai nembiak nyengkaum pengajar iya nya Gerempung Pengajar enggau Apai Indai(PIBG) bela besaup ba pengawa ngemansangka sekula.
Ba program merarau nya, iya bisi meri agih belanja RM10,000 ngagai PIBG SK St Leo (M) Gayau.
Ngenang kaul ke sama, Tr Endau Galang (Gayau Tinting) enggau Tr Dunggau Enti (Gayau Ulu) berasai gaga enggau pemansang ke udah digaga ba SK St Leo(M) Gayau.
Sekula ke udah beumur 60 taun nya ku seduai udah disikap perintah ke diarika Snowdan enggau perengka guna belajar ke chukup sereta lantang.
Udah tentu sekula tu meri pengelantang ngagai bala nembiak ditu ngulihka pelajar, ku seduai.
Bela datai Yang Dipertua PIBG SK St Leo (M) Gawn anak Embam, Koordinator Pengintu Sekula (LPS) Tr Tingga Medang enggau orang bukai. — DayakDaily
