Perintah negeri patut serius agi ngangkatmanah sekula buruk — Chong

Chong Chieng Jen

KUCHING, Jun 14: Chairman Pakatan Harapan (PH) Sarawak, Chong Chieng Jen ngansak perintah negeri chakah sereta terit agi bekaul ari isu pengelubah projek ngangkatmanah sekula buruk di negeri tu.

Ku iya, projek nya urung 85 peratus di belakang ari ke ditetap.

Opis Menteri ku iya, udah ngaga pemutus deka ngena Sistem Binaan Berindustri (IBS) ngaga projek nya, tang chara IBS ke dikena ngangkatmanah sekula buruk di menua pesisir nya enda relevan.

“Chara nya semina ngagai sekula ke besai sereta betul nitihka standard.

“nti kitai nguna IBS ngaga sekula di menua pesisir, nya meri pangka ngagai proses ngaga.

“Tu nyengkaum ari sukut perengka pengangkut enggau logistik, kelebih agi pengudah berundingka faktor kandang menua enggau geografi di menua pesisir Sarawak.

Dalam aum media di Indu Opis DAP Sarawak ditu, MP Stampin nya madahka perintah negeri patut serius beratika isu nya dikena nentuka projek ngangkatmanah sereta nirika baru sekula buruk ulih digaga nitihka timpuh ti ditetap.

“Enti enda diserenih silik, kitai deka nanggung ungkus besai enti ngaga projek ngangkatmanah ngena sistem nya (IBS).”

Chong mega deka nemu sekalika perintah negeri udah ngaga pansik silik sebedau ngaga projek nya. — DayakDaily