KUCHING, Nov 15: Baka ke disemaya, Perintah Negeri ngagihka belanja RM40 juta dikena ngemujur kereja nyukat tanah NCR ba 2019.
Pekara nya dipansutka Sapit Kepala Menteri Datuk Amar Douglas Uggah rambau Aum Dewan Undangan Negeri(DUN) di Komplek DUN semalam.
“Perintah Negeri nyendia agih belanja tu pengudah Perintah Besai enda meri agih belanja nengah Bajet Menua 2019,” ku Uggah.
Iya ke mega Menteri Betanam Betupi Moden, Tanah Adat enggau Pemansang Kandang Menua netapka agih belanja nya mandangka pengeran Perintah Negeri mutarka isu tanah NCR.
Ku iya, isu tanah NCR mungkur semua peranak asal di Sarawak.
“Kepala Menteri udah ngemendar belanja RM40 juta ngambika kereja nyukat tanah NCR nengah Seksyen 6 enggau Seksyen 18 Kanun Tanah Negeri ulih ditampung ba 2019.
“Bisi sekeda kaban kitai ba dewan ditu semina nemu nyalahka Perintah Negeri tang sida empu enda tegigaka belanja dikena mutarka isu tu.
“Kelimpah ari nya, sida suah deka nusutka rundingka rayat,” ku Uggah.
Berindik enggau nya, iya ngelalau rayat ngambika enda pechaya tuduh bala penyakal alai Perintah Negeri nengah Gabungan Parti Sarawak(GPS) sigi keranka mutarka isu tanah NCR.
Ngenang kaul bukai, iya madah Perintah Negeri ngena sistem Sempekat ba atur nyiri tuai rumah tauka ketuai komuniti.
Ketegal nya Uggah netapka perambu ari ADUN Ba’Kelalan enggau Krian diak atur milih nya ngena sistem bepilih enda diterima.
“Sistem Sempekat mengkang sistem ke pemadu manah endur ngenanka pengelantang sereta pemaik raban pupu bansa di nengeri tu,” ku Uggah. — DayakDaily
