KUCHING, Mei 31: Perintah negeri deka majak beratka pemansang infrastruktur di menua pesisir dikena ngerapitka seraka bida enggau di mengeri.
Kepala Menteri, Datuk Patinggi Abang Johari Tun Openg ba pesan Hari Gawai iya ngakun, agi mayuh perengkaguna infrastruktur deka dikemansang di menua pesisir.
“Komuniti Dayak mega agi auska pemansang di menua pesisir baka jalai alun, jematan, bekal ai, elektrik enggau ke bukai.
“Kitai udah 55 taun merdeka, tang agi mayuh pemansang deka digaga nyengkaum ngangkatmanah perengkaguna di menua pesisir.
Ku iya, perintah negeri mega dekaka tetiap rumah panjai enggau genturung pendiau di serata Sarawak ulih ngasaika infrastruktur jalai alun enggau bekal ai beresi sereta elekterik.
“Taja pia, gaya fizikal enggau faktor geografi Sarawak nyadi pemar besai dikena nentuka juluk rayat deka bisi perengkaguna ke manah ai ulih dikelengkaska.”
Taja pia ku iya, perintah negeri enda deka bedalih tauka nyalahka orang bukai ti nyadi kebuah Saawak mengkang tinggal.
Sarawak ku iya, sigi ngarapka belanja besai ari Perintah Besai ke tuju tu.
“Tambah mega kitai empai nerima agih belanja ke patut ba ke bisi dalam Konstitusyen Perintah Besai,” ku iya.
Aja pia, ngena pemansut belanja ke mimit, perintah negeri nguji deka ngemanah infrastruktur enggau oerengkaguna di menua pesisir Sarawak nguna belanja kediri empu.
“Aku ngarap perintah deka bulih mayuh agi penatai pemisi jemah ila nengah sekeda chara ke udah sereta deka diambi awakka perintah negeri mujur melanja pemansang infrastruktur di menua pesisir,” ku iya.
Taun tu, perintah negeri melanja RM2 bilion dikena ngemansangka sistem bekal ai ke pemaik ruang bilik di negeri tu.
Ungkup bekal elektrik menua pesisir, nya udah mungkur 50,000 ruang bilik lalu perintah negeri udah ngemasutka belanja RM1.7 bilion dikena ngaga sekeda projek di menua pesisir ari taun 2014 nyentuk taun siti nyin tadi.
Taun tu, perintah dijangka ngemansutka belanja RM94 juta dikena ngerembaika bungkur bekal elektrik ngagai 2,000 agi isi ruqng bilik di menua pesisir Sarawak. — DayakDaily
