KUCHING, Jun 3: Kepala Menteri, Datuk Patinggi Abang Johari Tun Openg ngenukuka bala ketuai perintah negeri deka besaup enggau Perintah Besai ba pekara ngatur negeri enggau menua, taja pan kedua-dua nya diari parti ke bebida.
Ku Abang Johari, kerejasama nya meseti bisi laban Malaysia begunaka intu sereta diatur enggau manah sereta tegap, dikena nentuka pemansang ulih dipejalaika belama.
“Kedua-dua piak sama begunaka pangan diri ngambi pulaika penegap ngatur menua.
“Malaysia sebuah menua ke kering, ti begunaka penuai runding ari sukut ngatur menua.
“Sarawak udah ngenukuka deka mantu sida,” ku iya lebuh dikerandau pemberita pengudah ngulu ‘Program Bubur Lambuk dan Bubur Pedas’ di Kpg Bintangor Kecil ditu, kemari.
Dulu ari nya ba pengerami ke sama, Abang Johari minta mensia mayuh anang irauka gaya politik menua ke diatu.
Perintah negeri, ku iya, deka majak ngaga bemacham program pemansang ungkup negeri tu.
“Anang irau laban Sarawak ngembuan mayuh jalai pemansut ti meseti diatur enggau manah dikena ngemajakka pemansang negeri tu jemah ila.
Ditanya sentang penemuai basa iya ngagai Menteri Besai, Tun Dr Mahathir Mohamad kena Hari Empat tu tadi, Abang Johari madahka nya penemuai basa baka selama. — DayakDaily
