Perintah komited ngurangka rega Internet

Gobind Singh Deo

KUALA LUMPUR, Julai 30: Perintah sekali agi nandu komitmen deka nentuka rega Internet dikurang ambis nadai 25 peratus manggai ujung taun tu, kelimpah nguji nambahka peneras enggau bungkur di serata menua.

Kelimpah neritka undang-undang bekaul dikena netapka rega siling, Menteri Komunikasi enggau Multimedia Gobind Singh Deo madahka sida, udah tu deka betemu enggau perintah negeri, kompeni telekomunikasi enggau pengemeran ungkup servis ‘last mile access’.

“Kami serius sentang pekara tu, aku deka mai semua ngambika ulih berandauka pekara tu.

“Nyema kami bulih bantu enggau kerejasama perintah negeri, pengawa nguna undang-undang, kompeni telekomunikasi enggau penguna sevis ‘last mile access’, asai aku ambis tumu juluk nyadi nyata ujung taun tu,” ku iya ba sesi tanya saut aum Dewan Rakyat, ditu sehari tu.

Iya nyaut tanya tambah Syed Ibrahim Syed Noh (PH-Ledang) sentang rega Internet ke agi mar.


Gobind mega sekali agi nandu penerang ti madahka perintah udah bejalaika Standard Mandatori Sentang Penetap Rega Akses kena Jun 8 suba, ke alai enti nya dipejalaika, semua kompeni telekomunikasi diberi timpuh nyentuk ujung taun tu nurunka rega internet sida ngagai 25 peratus nengah chara berenggat.

Iya mega madahka opis menteri iya benung dalam proses ngurangka proses birokrasi ba renggat perintah negeri dikena ngemudahka proses masang bungkur fiber optik baruh tanah ari baruh Inisiatif Internet Menua. — DayakDaily