Perintah komited munaska penyeranta ba lima negeri

Cash. — DayakDaily.com file pic.// Photo: Pixabay

KUALA LUMPUR, Julai 24: Opis Menteri Pemansang Menua Pesisir benung mansik deka bejalaika program baru munaska penyeranta di beberapa negeri baka Kedah, Kelantan, Perak, Sabah enggau Sarawak.

Sapit Menteri nya, R. Sivarasa madahka singkang nya patut laban negeri nya kurang perati ari sukut munaska penyeranta sebedau tu.

“Perintah komited deka bejalaika program munaska penyeranta sereta nambah penatai pemisi kelimpah mansik program baru ke ulih dikena kelebih agih di Kedah, Kelantan, Perak, Sabah enggau Sarawak,” ku iya nyaut tanya Leow Hsiad Hui (PH-Hulu Selangor) ba aum Dewan Rakyat kemari.

Ku iya, entara program ti dipejalaika baka program ngaga rumah ungkup rayat pemadu seranta, program latih pengelandik enggau kereja, program nambahka penatai pemisi enggau program dagang ‘Cabaran Perniagaan Luar Bandar’ (RBC) kena mantu nambahka penatai pemisi ruang bilik menua pesisir.

Sivarasa mega madahka perintah nemu agi raban bansa Orang Asli di menua tu ke empai ngasaika tikas pengidup ke engkeman. — DayakDaily