Perintah deka ngintu manah negeri Sabah enggau Sarawak

Tun Dr Mahathir Mohamad

KUALA LUMPUR, September 1: Tun Dr Mahathir Mohamad ngenukuka perintah deka ngintu manah sereta enda bechiping ngagai enggau Sarawak sereta enda mida ba polisi enggau pemansang di kedua-dua negeri nya enggau negeri-negeri Semenanjung Malaysia.

Menteri besai madah, dalam pekara gaji minima ambika chunto, kedua-dua negeri nya deka ngasaika penyampau ke sebaka enggau Semenanjung Malaysia kelimpah pemansang infrastruktur ke sama.

“Kitai meseti ngemansangka infrastruktur di Sabah enggau Sarawak ngambika sama enggau infrastruktur di Semenanjung, tang meseti dikeingat penyampau peranak din kurang ari di Semenanjung.

“Nya kebuah kitai dipeda baka beratka peranak di Semenanjung tang ke benar iya kitai ngambi kira ‘return on investment’ sekalika infrastruktur nya ulih dikena peranak Sabah enggau Sarawak magang,” ku iya maya sesi dialog ‘Kongres Masa Depan Bumiputera dan Negara 2018’ ditu sehari tu tadi.

Iya mega ditanya sentang atur perintah dikena mantu Sabah enggau Sarawak ngambika kedua-dua negeri nya ulih ngasaika pemansang sebaka enggau di Semenanjung Malaysia.


Dr Mahathir madah, perintah mega deka ‘ngidupka’ baru Sempekat Malaysia 1963 sereta fokus ngaduka sekeda akan pekara ke bisi dalam nya bepelasarka pengulih perintah.

Iya mega ngarapka sekeda piak ti ngarika Sabah enggau Sarawak ulih ngenataika penemu dikena nentuka perintah ulih ngemansangka kedua-dua negeri nya.

“Dalam Kabinet mega kitai bisi chukup pengari ari Sabah enggau Sarawak lalu sida tu ukai orang ke diau diri aja tang suah ngerara seewta fokus ngagai gaya ke nyadi di Sabah enggau Sarawak,” ku iya.

Dulu ari nya, menteri besai mega bisi bejaku ba kongres ke diatur enggau tuju nyadi pelasar perintah ngaga agenda negapka ekonomi baru Bumiputera. — DayakDaily