KUALA LUMPUR: Perintah enda bebatak asur enggau ulah orang ti bekimpin bejaika industri minyak sawit menua, laban deka ngetanka pengidup 650,000 pekebun mit, pia ku Sapit Kepala Menteri Datuk Seri Dr Ahmad Zahid Hamidi.
Ku iya, perintah deka ngelaban orang ti bejalaika kimpin bejai minyak sawit lalu ngambi atur ke patut ba sida nya.
“Kitai enda tau enda ngelaban semua kimpin negatif ngagai minyak sawit. Kitai deka malas nengah chara rasional sereta mantaika pengamat bekaul isu berimba kampung sereta ngemunaska pengidup jelu siga,” ku iya bejaku ba Pengerami ‘Anugerah Kepimpinan Industri Minyak Sawit’ ditu malam kemari.
Zahid madah, kemaya hari tu industri minyak sawit betapi enggau pemar ke nadai kala nyadi sebedau tu, ketegal kimpin bejaika minyak sawit kelebih agi ari Gempung Eropah ke sechara sistematik ngachau industri nya.
“Nya alai Malaysia enda tau enda nyingkang ke mua mandangka setipikit ke penegap ti nguna chara betanam betupi ke pemadu manah. Kitai meri chap minyak sawit enggau naka pemanah laban minyak tu mayuh guna sereta manah ke pengerai,” ku iya.
Ahmad Zahid nangkanka nya lalu nyuaka ‘Anugerah Kepimpinan Industrit Minyak Sawit ke-10’ ngagai ex Ketuai Pemesai Eksekutif Kaunsil Minyak Sawit Malaysia (MPOC), Tan Sri Dr Yusof Basiron lalu Ketuai Pemesai Operasi, Sektor Ladang Felda Global Ventures Holdings, S. Palaniappan nerima Anugerah ‘Kecemerlangan Sepanjang Hayat’.
Ahmad Zahid mega madahka Malaysia enda tau enda ba rintai baris mua nguna teknologi baru dikena nambah rega ngagai industri minyak sawit.
Ku iya baru, bisi pematut ngansak chara betanam nguna injin, ngambika kurang agi bepanggai ba pengereja pengawa.
Taun siti nyin tadi, Malaysia ngeluar nyauka 20 juta tan minyak sawit ke alai penyampau eksport manggai RM67 bilion.
