KUCHING, Jun 8: Penganalisis politik, Datuk Peter Minos madah, taja pan Sarawak bisi hak penuh ba tanah, kampung enggau bemacham asil pegeraja asal ke ditemu di tanah negeri, tang mensia mayuh deka nemu baka ni gaya asil minyak enggau gis ke ditemu di negeri tu.
Iya nanya nama kebuah perintah besai ngaga Akta Pemansang Petroleum 1974 lalu udah nya ngambi hak Sarawak ke bekaul enggau asil minyak enggau gis?
“Ku aku perintah besai deka beambi ulih ba asil minyak enggau gis Sarawak laban deka bulih duit bebilion ringgit,” ku Peter, ke mega nyadi Chairman Majlis Perbandaran Kota Samarahan.
Ex-Penulung Sekretari Besai Parti Pesaka Bumiputera Bersatu (PBB) nya madah, kenyau ari taun 1974, perintah besai nengah Petronas, udah bulih penguntung bebilion ringgit ari asil minyak enggau gis Sarawak.
“Ba aku, enti Sarawak bulih penguntung enggau pemaik ari asil tanah, kampung enggau pengeraja asal negeri, ari asal bepelasarka sejarah enggau peturun ke disukung enggau undang-undang, Sarawak patut ngasaika asil ari minyak enggau gis ke ditemu di negeri tu.
“Barang bagi undang-undang, baka Akta Pemansang Petroleum ke ngambi hak Sarawak ti beambi ulih ari pengeraja asal negeri, undang-undang nya ukai aja enda lurus, tang mega bechiping.” — DayakDaily
