BARAM, Dis 5: Ulah ti majak nyadi gian dadah kelebih agi ba kandang menua pesisir diatu balat ngirauka ati, pia ku Kaban Kunsil Negeri Mulu Datuk Gerawat Gala.
Ku iya, apai indai kelebih agi di menua pesisir patut semampai beratika ulah anak sida ngambika enda tepejuh ngaul diri enggau ulah gian dadah.
Ku iya, nyema apai indai ngasaika anak sida sbisi ngaul diri enggau dadah, ripot jampat ngagai opis bekuasa ngambika sida ulih diperubat ba palan ngeraika ulah gian dadah.
“Enti penanggul dadah tu enda diperati ari renggat ke tumu, nya deka meri penanggul besai ukai semina ngagai sida ke gian tang mega ngagai semua komuniti,” ku iya.
Iya ke mega Sapit Speaker Dewan Kunsil Negeri (DUN) Sarawak madah, nya mega dikena nentuka ulah gian dadah ulih diseliah ari majak ngerekai sereta ngerusak rebak baru diatu. — DayakDaily
