Peranak Ulu Baram dipinta sedia napi empas ED

Kepala Menteri Datuk Patinggi Abang Johari Tun Openg

MIRI, Nov 29: Peranak menua pesisir kelebih agi di Ulu Baram nyendiaka diri nerima empas ekonomi digital (ED) nyengkaum pengawa ngaga jematan Marudi ke deka berengkah taun baru.

Ku Kepala Menteri Datuk Patinggi Abang Johari Tun Openg, Jematan Marudi ke meraka Batang Baram ukai aja meri sambung terus ari Miri ke menua pesisir mega deka nambahka penyampau temuai datai kia ila.

Ku iya, enti jematan nya udah tembu digaga ila peranak Ulu Baram dipinta kreatif agi matak penatai temuai ngagai menua sida sereta ngelakuka produk nengah ekonomi digital.

“Diatu enti deka ngelakuka dagang temuai meseti ngena chara digital, sekalika nguna virtual reality (VR) tauka augmented reality (AR) ngambika Miri dipromosi ba laman sosial, lebih ngenampakka menua Miri ke amat lalu tu mih chara baru kitai matak penatai temuai.

“Nguna pemaik media sosial kitai ulih mantai ngagai dunya nyengkaum sekeda rega produk dagang temuai kitai, lalu kitai enda ulih nyeliah ngambika meri empas positif ngagai ekonomi,” ku iya. — DayakDaily