KUCHING, Nov 5: Peranak Sarawak ke ngembuan penau tinggi ke gawa di menua luar deka diumbuk pulai lalu gawa di nengeri tu, ku Kepala Menteri Datuk Patinggi Abang Johari Tun Openg.
Berindik enggau nya iya madah perintah negeri deka ngiga chara ke tau ngumbuk sida pulai.
Dikena ngemujur juluk nya, Yayasan Sarawak meseti bisi data sentang peranak Sarawak ke gawa di menua luar baka ke di Amerika enggau Britain.
“Peranak Sarawak ke nerima gelar khas kepala menteri ari Yayasan Sarawak suah agi deka gawa di menua luar.
“Tu mandangka nengeri tu enda nyendia awak gawa ke chukup ungkup sida.
“Kitai meseti ngumbuk sida pulai, gawa ditu lalu nyaup ngemansang Sarawak,” ku iya
Abang Johari mansutka jaku nya ba pengerami nyuaka gelar khas Kepala Menteri (Yayasan Sarawak) ke.diatur di Begunan DUN Baru kena malam Hari Lima tu tadi. — DayakDaily
