MIRI, April 3: Penemuai dua hari Menteri Besai Datuk Seri Najib Tun Razak ke utara Sarawak sehari th enggau Hari Empat dikearap mai berita manah ngagai peranak di Pasar Bekenu ke 50KM ari tu.
Menteri Muda Orang Indu, Ruang Bilik enggau Pemansang Tumu Nembiak Mit ke mega ADUN Bekenu, Rosey Yunus madahka penemuai menteri besai nya ke Bekenu kena lemai Hari Empat ila sigi lama udah dianti lalu ai berita manah kelebih agi projek ti pulaika pemaik rayat.
“Kami ngarapka bisi berita manah bekaul enggau projek Infrastruktur sereta servis pengerai laban atut bisi sebuah klinik pengerai ba kandang menua Niah,” ku iya.
Ku Rosey, perambu ngaga Klinik Pengerai Niah patut dikejampat ngambika pwranak enua dia bisi palan servis pengerai ke besemak kelebih agi ti diau di menua pesisir.
“Diatu bisi peranak menua pesisir nurun berubat ke Klinik Pengerai Miri, endur nya kelalu jauh nyentuk ke bisi sekeda nurun dinihari lalu bebaris panjai ngulihka lumur diri,” ku iya.
Kelimpah projek infrastruktur, Rosey ngarapka projek bekaul enggau dagang temuai mega dikemeratka Najib kelebih agi projek pantai Tusan ke diatu betapi enhgah penanggu pasir tusur.
“Pantai Tusan bisi potensi dagang temuai ke besai lalu ngarapka bisi ungkup belanja ngambika palan nya ulih dikemansang nyadi palan pematak temuai ditu,” ku iya.
Pantai Tusan tebilang enggau penyadi “Blue Tears” ke alai pantai nya diterang enggah chura birh muak ke malam nyentuk ke dikerembai ba media sosial kelimpah tebing batu ti dikelala enggau ‘Batu Kuda’ ke dipeda baka pala siku kuda ti benung ngirup ai tasik.
Rosey mega ngarapka Palan Transformasi Menua Pesisir (RTC) Sibuti di Bekenu dikemanah ngambika mayuh agi opis enggau ejensi perintah ulih beoperasi.
“RTC Sibuti beguna amat ke peranak menua ditu kelebih agi menua pesisir, lalu dikearapka dikemansang nengah renggat kedua, ku iya.
Ke rekod, RTC Sibuti berengka beoperasi kena 15 Januari taun 2015, keterubah di Sarawak endur bemacham opis enggau ejensi perintah, nstitusi wang engga ATM.
Entara opis, ejensi enggau institusi wang ke beoperasi dia baka Opis Pengintu Pengelantang Pendiau Raban Bansa (JKM), Opis Pengerejiata Bansa (JPN) Majlis Amanah Rayat (MARA), Lembaga Kemajuan Ikan Malaysia (LKIM) enggau Agrobank.
Nitihka tusun penemuai ti disadung Opis Pemadah Sarawak, Menteri Besai disadang datai di Miri lemai tu nutup Seminar Pemansang enggau Ketuai Pupu Bansa sereta Ketuai Raban Bansa Renggat Negeri Sarawak ba Hotel Pullman ditu.
Muak ke malam, Najib ngulu pengerami Makai Lemai Begulai enggau Rayat ba Eastwood Valley Golf and Country ditu.
Kena Hari Empat Najib deka ngulu tiga pengerami iya nya Pengerami Begulai enggah Rayat sereta pengerami Nasih Tanah Jematan Baram di Marudi ditangkanka pengawa nyerahka projek Hidroelektrik Bakun ngagai Perkntah Negeri Sarawak lalu ke penudi endar ninjau esplanade enggau Bazar Bekenu sebedau mulaika diri ngagai Kuala Lumpur. — DayakDaily
