KUCHING, 23 Ogos: Peranak Menua pesisir diperansang ngaul diri ba pengawa nupi ikan nitihka chara sistem tagang ba sungai ngambi ulih nyaup nambah penatai pemisi ruang bilik.
Sapit Kepala Menteri Datuk Amar Douglas Uggah Embas madah Opis Betanam Betupi ulih mantu nyendia anak ikan.
“Opis Betanam Betupi ulih nyendia anak ikan baka ke tengadak, semah enggau empurau.
“Ikan tu chukup berega ba makit,” ku iya ba sebengkah pengerami begulai enggau rayat di Rh Henry Ilon, Senunok di Betong kemari.
Ba pengerami nya, Uggah ke mega Menteri Betanam Betupi Moden, Tanah Adat enggau Pemansang Kandang Menua ngagihka geran RM200,000 ngagai Rh Henry.
Geran nengah program ubah menua pesisir (RTP) dikena ngaga dinding ngenan tanah tusur sereta ngemanah tanju rumah panjai 13 pintu nya.
Ku Uggah, perintah udah nusun mayuh program pemansang tanah di menua pesisir ti tau nambah penatai pemisi rayat.
Ba pengerami ke sama, Uggah ke mega ADUN Bukit Saban bisi ngagihka anak jani ngagai 47 iku penerima.
Iya meransang bala penerima anak jani nya ngaul diri ba pengawa nupi jani chara komersyel ketegal jani idup enggau dagin jani bisi mayuh peminta ari komuniti Dayak kelebih agi ba maya pengerami Gawai.
Ku Uggah, peranak menua pesisir patut nguna teknologi moden ti tau nambah penyampau jelu tupi.
Bela datai Pengarah Opis Servis Veteriner Negeri Dr Adrian Susin enggau Sekretari politik Kepala Menteri Dr Richard Rapu.-DayakDaily
