Peranak Bangkit Kemantan enggau Luban Ulu nerima bantu pemakai

Bantu pemakai diagih ngagai peranak di Bangkit Kemantan enggau Luban Ulu

Oleh Chris Bishop

KUCHING, 9 MAC: Peranak di kandang menua Bangkit Kemantan enggau Luban Ulu dalam Sitak Kunsil Negeri (DUN) Bukit Saban ke benung diterit Atur Bepekul nerima bantu pemakai kemari.

Nitihka riput Unit Komunikasi Awam Sarawak(UKAS), bantu nya datai ari Sapit Kepala Menteri ke mega Adun Bukit Saban Datuk Amar Douglas Uggah sereta MP Betong Datuk Robert Lawson Chuat.

Dulu agi ari nya, Komiti Penyah Penusah Bagi Menua Betong nengah Opis Pengintu Pendiau Raban Bansa (JKM) Betong bisi mega nyuaka bantu pemakai ngagai kededua rumah panjai.

Penyampau 26 ruang bilik ari Bangkit Kemantan sereta 48 ruang bilik ari Luban Ulu diteritka Atur Bepekul ngambi tau mantu ngemudah Pengawa Nyidi Kes Berampit (ACD) Covid-19.

Berebak enggau nya, Tuai Rumah ari kededua rumah panjai mega meri terima kasih ngagai Uggah sereta Lawson laban udah beratika penusah ditapi sida serumah.

Atur Bepekul ba Bangkit Kemantan berengkah ari 4 nyentuk 17 March lalu Luban Ulu berengkah ari 5 nyentuk 18 Mac tu.

Pengawa ACD dipejalaika beduduk ari penyadi Kluster Jalan Muhibbah. – DayakDaily