KUCHING, Mac 29: Pengerami nasih tanah kilang ngaga panel sistem modular ditu pagi kemari tachuh lebuh siku orang tuai ngenyit sendat seput.
Penusah nya nyadi urung pukul 10.40 pagi ke alai bini orang tuai nya meda laki iya jejengap sendat seput lalu minta tulung mensia mayuh dia.
Menteri Kunsil Kandang Menua enggau Pengawa Berumah Sarawak ke mega Kaban Kunsil Negeri (ADUN) Batu Kawa Datuk Dr Sim Kui Hian maya nya baru bejaku urung dua minit lalu begaut nurun ari panggau mantu orang tuai nya.
Sama enggau mantu orang tuai nya ADUN Demak Laut Dr Hazland Abang Hipni, ex-ADUN Demak Laut Datuk Dr Abang Abdul Rauf Abang Zen, dua iku tukang gambar ari The Star enggau Utusan Sarawak sereta mensia mayuh bukai ke bisi ngulu pengerami nya.
Dr Sim dibantu Dr Hazland bertindak meresa kedap seput iya sebedau orang tuai nya ditaban ngagai sebengkah palan berubat peribit.
Pengudah mantu orang tuai, Sim lalu niki baru ke atas panggau nampung jaku iya.
Abang Johari ti bejaku nangkanka nya muji penyikar Dr Sim seraya madahka Presiden SUPP nya siku ketuai ti beratka rakyat ke beguai ngetu bejaku lalu mantu orang tuai nya. — DayakDaily
