KAPIT, Mac 16: Kaban Parlimen Hulu Rajang Datuk Wilson Ugak minta pengundi indu di Hulu Rajang majak nyukung Barisan Nasional (BN) ba Pengawa Bepilih Besai Ke-14 (PRU14) tu ila.
Ku iya, raban indu mayuh mantu nempa penyukung BN kelebih agi basitak enggau ruang bilik sida.
“Aku enggau naka ulih gawa ke sitak tu. Hulu Rajang menua ke besai ti mungkur tiga konstituensi Kunsil Negeri (DUN) iya nya Baleh, Belaga enggau Murum.
“Kitai agi tinggal dalam aspek pemansang infrastruktur. Ketegal deka mai mayuh agi pemansang, aku udah ngangauka sapit menteri pengerai nemuai ke Kapit enggau Mujong.
“Beberapa hari dulu ari tu, Menteri Pelajar Datuk Seri Mahdzir Khalid mega udah nemuai ngagai SMK Baleh enggau SMK Lepong Baleh meda gaya sekula di menua pesisir ke alai isu nya udah dibai aku ngagai parlimen ngambika nembiak ulih ngasaika perengkaguna baka di mengeri,” ku iya.
Iya mega madahka diri deka mai mayuh agi projek pemansang ngagai Hulu Rajang nyema dichalun baru ngenanka parlimen Hulu Rajang ngarik BN.
Dalam timpuh dua ngagai tiga taun ke deka datai ku iya, jalai ari Mujong ke Putai dijangka tembu digaga.
“Ari nya peranak menua din ulih ngena entukar ke Kapit lalu kitai merambu muka tanah di Baleh endur betanam baka nanam getah dikena.ngulihka penatai pemisi” ku iya. — DayakDaily
