SIBU, April 26: Pengundi patut terus meri sukung penuh ngagai chalun Barisan Nasional (BN) ba 31 kerusi Parlimen di negeri tu maya PRU14.
Kepala Menteri Datuk Patinggi Abang Johari Tun Openg madahka pemujur besai nya beguna amat dikena nentuka Sarawak ulih ngambi pulai hak enggau kuasa ari baruh Sempekat Malaysia 1963 ari Perintah Besai.
BN Negeri nagit menang ba 28 kerusi maya PRU tu ila laban ba PRU ke sebedau tu, BN semina menangi ba 25 kerusi.
“Kita meseti beserakup. Enti kitai beserakup orang deka mendingka jaku kitai,” ku iya.
Iya bejaku munyi nya ba seminar Pemansang enggau Nyadi Ketuai, Ketua Raban Bansa enggau Etnik Renggat Negeri Sarawak 2018 (Bagi Sibu, Mukah & Kapit) ditu kemari.
Kenyau ari ke nyadi Kepala Menteri ba bulan Januari taun siti nyin tadi, Abang Johari terus negika hak Sarawak nyengkaum ari sukut minyak enggau gis sereta nganjung rban ke London mansik dokumen ke bekaul.
Ku Abang Johari, ba PRU14 tu BN mayuh mantaika orang baru laban siti ari chara ngulihka hak Sarawak.
Ari 31 iku chalun BN kw deka bediri minta pilih kena Mei 9 ila, BN ngengkah 15 orang baru. — DayakDaily
