KUCHING, 4 April: Udah 48 taun bala raban Border Scout Nyayang Angie ditegah munsuh lebuh merau mansa menua dikumbai Lubuk Garan di Julau kena 30 Mac, 1973.
Tajapia, pengingat iya ka penusah nya sigi meruan enda nemu ayas lalu ulih becherita enggau terang sereta berurun.
Sida sigi nyadang utai baka nya nyadi laban semangat sida ti nyadi Border Scout maya nya sigi tampak selalu dipeda munsuh.
Bala ti nyadi Border Scout endang orang ti berani berambunka nyawa ngetanka menua.
“Aku tu sigi rindu ngayau ngiga munsuh. Lebuh nyadi Border Scout tu nyau digaji orang ga ngayau. Nama utai digiga agi lebih ari nya” ko Nyayang.
Nitihka Prof Madya Dr Neilson Ilan ari Fakulti Sains Sosial, Universiti Malaysia Sarawak, saut Nyayang nya ngembuan reti ti dalam.
Kesatu ku Neilson, saut nya mandangka pemerani ti dikembuan Nyayang lalu kedua mandangka pengangkun ati ti deka meda menua likun nadai pengachau diregau bala munsuh kelebih agi komunis.
Cherita bepun lebuh sida mudik mulaika diri ngagai Pos Entabai kira pukul 4 ngalih hari dia alai enda mukai-mukai sida lalu ditegah munsuh be Lubuk Garan.
Perau Nyayang dudi mimit lalu sebuah agi perau sida udah dulu. Empai lama sebedau tu sida udah bisi bulih munsuh lalu berita bisi ayan madahka munsuh deka bebalas.
Endang sigi baka tegah bala komunis ngagai orang ti ngena sungai, sida endang selalu nyelinting napatka injin.
Laban enti injin jai, dia alai bala orang ti ba perau nadai daya agi. Perau mega ulih tepelintang.
Lebuh ke ditegah munsuh injin ti dipegai Nyayang agi ulih idup lalu sambil megai injin, iya sempat ngedarka senapang lalu nimbak ngagai tunga komunis.
“Kami (tubuh empat) sama nimbak nitihka tunga asap senapang laban enda ulih meda alai munsuh belalai ba tebing,” ku Nyayang.
Ba penusah nya, siku ari sida labuh ke ai lalu ditabankan ai anyut ke ili. Datai ba kerangan dia alai iya lalu dipeda sereta ditimbak munsuh.
Nyayang enggau bala bukai ari perau sama nadai daya malas tang meda ari jauh aja laban sida pan sama agi malas timbak munsuh.
“Perau Nyayang sigi udah mati jalai lalu ba tengah “Killing Zone”. Lebuh sida nguji mudik ka ulu sida diperejin bala munsuh ti ngipa sida muak ka ulu.
“Lebuh sida anyut ke ili, sida mega ditimbak munsuh ti sedia nganti ba ili. Lama endar sida kual-kual surut mansang bepusin ba menua Lubuk Garan lebuh ti ditegah munsuh seharinya.
“Nitihka pengingat Border Scout Nyayang bisi nyau ka dua jam sida sebuat tepekul ba nya,” ku Neilson.
Munsuh nyau badu nimbak lebuh perau sida ti dulu agi nyau nikal ngabas ngesah meda sida lalu enda ayan nadai dipeda nitih ari belakang. Nyayang sereta raban bukai ke ba perau nadai bebadi.
Siku ari sida ti kena timbak munsuh nya mega agi ulih idup.
Nyayang becherita ngagai Neilson Ilan sereta Dr Regina Garai ba Sibu kena 26 September, 2020 alai seduai benung mansik sereta nulis bup senentang sejarah Rejimen Renjer ti munaska komunis di Sarawak.
Ku Neilson, rayat negeri tu berasai temegah enggau pemerani ti dipandangka bala Border Scout lalu amat untung laban ketegal sida kitai ulih ngasaika pengelikun menua.
“Kitai sigi patut ingatka pengawa sida tu. Sida tu meh bala bujang berani ti udah mutus ati ngetanka menua kitai,” tandu Neilson.
Ngenang kaul ke sama, Regina madah cherita tegah munsuh ba Lubuk Garan tu endang patut ditemu bala mayuh kelebih agi bala nembiak rebak diatu.
Ku iya, bala Border Scout tu udah mandangka pemerani ti chukup tinggi lalu bebendar nyabung pemerani berambunka nyawa dikena ngetanka menua.
“Tajapan ensepi pemerinsa lebuh ditegah munsuh, sida endang nadai mantul nadai ngechul sereta tetap berambunka nyawa sida,” ku Regina. — DayakDaily
