Pengerusak kabel baruh tanah di Selangau nyadi ketegal pengilap kontraktor

KUCHING, Jun 11: Sarawak Energy Berhad (SEB) madahka piak kontraktor ti ketiga ke patut megai tanggungpengawa sentang pengerusak ti nyadi ba kabel baruh tanah di Selangau, ke ngasuh kuasa karan di kandang menua nya tejanggal.

Nitihka ripot, genturung pendiau di Selangau nerima penanggul kuasa karan sepengelama tujuh jam kena ke Hari Minggu tu tadi, ketegal pekara tu.

“Kabel baruh tanah bekuasa 33kV di simpang jalai Selangau-Mukah (ba taba jalai Jalai Besai Pan Borneo) udah rusak ketegal pengawa ngaga jalai, ke udah ngasuh kuasa karan bisi tejanggal kena ke pukul 8 pagi (Hari Enam), ke udah ngasuh urung 500 iku peranak di Jalai Sepiring, Kemena enggau Ulu Sungai Arip ndai karan,” nitihka penerang ti udah dipadah ari piak SEB, seraya nambah madahka taja kuasa karan bisi ditampung maya pukul 3 lemai nengah kuasa ari Tatau, tang pegawa nyeruri tembu digaga kemari ketegal mayuh pengerusak ti nyadi.

Menijer Kompeni Sesco Bhd (SESCO) Hung Sing Ee madahka pengirau sentang pengawa nyungkur jalai ba projek PBH ke udah ngeruga bekal kuasa karan mayuh pelanggan SEB.

Sesco iya nya raban SEB.

“Kami udah nganjung bala juruteknik matau pengawa ba endur nya lalu nangkan bala kontraktor ti bekereja bedampih enggau fasiliti kami, tang, penanggul bansa tu tetap nyadi.

Ba Selangau aja bisi 22 kes nyadi ti ngauk pengawa nyungkur kenyau ari projek Jalai Besai Pan Borneo tu berengkah.

Ba rikod iya, Ketuai Pemesai Eksekutif Sesco Lau Kim Swee madahka insiden ke bansa tu ulih diseliah nyema kontraktor bisi meresa enggau SEB dulu sentang endur kabel tu sebedau bejalaika pengawa sida.

“Mekalka kuasa karan ngagai penguna kami endang pekara ti keterubah dirunding kami, tang pengelikun bala kontraktor ti bekereja dampih enggau kabel kami ti agi bisi kuasa karan nya mega ngirauka kami.

“Pengelikun endang nyadi pekara keterubah dirunding dalam Sarawak Energy lalu kami enggaika sapa-sapa bebadi tauka pedis, kelebih agi kontraktor, iya nya piak ti ketiga. Pengujung iya, kami mega dekaka semua orang pulai enggau likun,” ku iya nyemetak.

Lau mega nangkan bala kontraktor enda semina nyangka aja endur tauka penalam kabel dalam tanah nya, sida patut semampai meresa endur kabel nya dikena nentuka pengelikun kereja ba taba projek nya.

SEB bisi ngerikod 135 iti kes bekaul pengerusak kabel dalam tanah ti nyadi laban kunteriktor piak ketiga sereta perengka sambung ke bukai kenyau ari taun 2016. Insiden tu udah ngena urung RM1 milion sentang mutarka penanggul nya lalu udah ngenataika penusah ngagai penguna SEB.

Bala kunteriktor tau betelefon ngagai tim teknikal SEB ba lumur 1-300-88-3111 tauka emel ngagai customercare@sarawakenergy.com.my dikena nentuka pengelikun sida bekereja di luar. — DayakDaily