Pengerami Gawai Renggat Negeri 2019 diatur di Pelilih Kuching enggau Serian

Uggah(duduk empat kanan) bejaku ba aum pengarang berita di Wisma Bapa Malaysia. Bela dipeda Rundi(duduk empat kiba) enggau Manyin(duduk tiga kanan).

Dikarang Chris Bishop

KUCHING 22 Mei: Pengerami Gawai Renggat Negeri 2019 deka diatur enggau mayuh bengkah pengawa ‘Authentic Gawai’.

Sapit Kepala Menteri Datuk Amar Douglas Uggah Embas madah pengawa nya deka ngerichah pengerami gawai kelimpah nyaup mandangka adat enggau main asal Dayak.

Ku iya, pengerami taun tu deka diintu nitihka chara bansa Bidayuh alai sekeda genturung pendiau di Kuching enggau Serian udah dipilih.

“Ungkup taun tu gintir bansa Bidayuh ngatur pengerami gawai renggat negeri.

“Komiti kereja udah ngatur mayuh bengkah ‘Authentic Gawai’ di genturung pendiau tauka di rumah panjai bansa Bidayuh,’ku Uggah.

Iya mansutka jaku nya ba aum pengarang berita pengudah nyadi chairman Aum Komiti Besai Pengerami Gawai Dayak 2019 di Wisma Bapa Malaysia ditu, seharitu.

Uggah ke mega Menteri Betanam Betupi Moden, Tanah Adat enggau Pemansang Kandang Menua nambah pengerami taun tu deka dipungkal di Rumah Panjai Anah Rais di Padawan berengkah 31 Mei nyentuk ngagai 1 Jun.

Nangkanka nya ku iya, pengerami mega diintu di Rumah Panjai Pueh di Lundu(31 Mei-2 Jun).

“Gawai renggat negeri mega diintu di Dewan Suarah Bau kena 22 Jun alai deka mega diatur di Rumah Panjai Jagui-Duyuh kena 31 Mei,’ku iya.

Pengerami Gawai 2019 ti nungkatka rambai jaku “Indi Awang, Indi Asung'(Sehati Sejiwa) tu deka ditutup di Rumah Panjai Pichin di Serian kena 29 Jun, tandu Uggah.

Iya nambah, pengerami besai gawai ke nyadi Pengerami Makai Lemai Gawai 2019 deka diatur kena 15 Jun 2019 di siti hotel tebilang di Kuching.

Pengerami nya ku iya deka digulu Tuai Pemegai Menua(TYT) Tun Pehin Sri Abdul Taib Mahmud enggau Kepala Menteri Datuk Patinggi Abang Johari Tun Openg.

Kelimpah ari nya, Uggah netapka pengerami gawai taun tu deka ngangkatka pekara ke bekait enggau dagang temuai.

Ku iya, gawai ke diintu ba renggat pelilih menua deka ngelaku pekara dagang temuai alai nya seraris enggau Taun Nemuai ke Sarawak.

“Genturung pendiau ke dipilih iya nya ke bisi nyendia program nyemilik,”ku iya.

Bela datai Chairman Komiti Kereja Gawai 2019 Dato Sri Micheal Manyin ke mega Menteri Pelajar, Sains enggau Pansik Teknologi enggau Menteri Utiliti Dato Sri Dr Stephen Rundi. -dayakdaily