Pengelandik ngaga pua kumbu dikerembai nyadi pengawa dagang

Blantau (kiba) enggau anak iya lebuh ti mandangka pua kumbu enggau asil pengelandik jari bukai ti digaga ba Agrofest 2018, bedau lama udah.

KUCHING, Okt 29: Pengawa ngaga asil pua kumbu enggau ngepan bansa Iban ukai pengawa ke mudah enti enda dikereja enggau ati ti liat, peneleba sereta pengelandik.

Taja pia, nya ukai nyadika penanggul ngagai Blantau Bantan ti udah ngemeranka pengawa nya kenyau ari iya ke beumur 20 taun.

Lebuh ke dikerandau pemberita maya Agrofest 2018 ke diatur ba Penview Convention Centre (PCC) bedau lama udah, iya madahka pengelandik ngaga asil pengelandik jari baka pua kumbu, kain kebat, baju burung, tanggu, selampai, kain selendang, lapik mija enggau lapik sofa ke bisi motif Iban nya ditampung iya ari indai enggau ini iya suba.

Beasal ari Melinau Nanga Meluan Kapit, diatu Blantau ukai semina ngemeranka pengawa ngaga pua kumbu nya aja, tang ngerembaika nya nyadi dagang ari baruh Rornalidam Enterprise.

Bemacham saiz enggau chura pua kumbu ke digaga Blantau bisi dipandangka maya Agrofest 2018.

Ku iya, keterubah ngepunka pengawa nya suba, iya ngemansutka diri belanja dikena meli kereban dikena ngaga nya.

Taja pia, diatu iya bisi nerima bantu ari Opis Betanam Betupi Sarawak sepenyampau RM10,000 dikena iya meli perengka dikena ngaga sereta ngerembaika nya nyadi dagang.

Ku Blantau, iya ngaga asil pengelandik jari nya di rumah anak iya di Pasar Kapit ke lalu nyadi palan iya nyual asil ke udah digaga ungkup kandang menua Kapit.

Kelimpah ari nya, pua kumbu ke digaga iya mega bisi dijual ngagai kandang menua bukai baka Lubok Antu, Waterfront Kuching, Kampung Budaya Kuching, Sarikei, Engkilili enggau di Sri Aman. Kelimpah ari nya, pua kumbu enggau utai bukai ti digaga iya mega bisi dikelaku nengah facebook.

Ku iya, pengudah ke nerima bantu ari Opis Betanam Betupi, iya bisi suah agi dibai opis nya nyual sereta ngelakuka produk iya ba pengerami besai baka ba Program Sejiwa Senada Kapit 2016, Karnival Jualan Sibu taun 2017 enggau ke diatu Agrofest 2018.

Lebuh ke ditanya sentang kereban ke dikena iya ngaga pua kumbu enggau baju burung, Blantau madahka nya digaga ari utai asal ke diambi ari babas baka sebengki, daun tarum dikena nyelup, daun kerebai enggau daun engkudu.

Blantau mega madah, pengelama proses ngaga siti baju burung iya nya urung sebulan lalu pua kumbu urung dua bulan, nitihka pemesai.

Tanggu enggau baju burung ke bisi dipandang sereta dijual ba palan pemandang Blantau maya Agrofest 2018.

Rega tetiap asil pengelandik jari ke dijual iya nya mega bebida bepanggai ba bansa uubung tauka barang mata ke dikena iya ngaga.

Baka baju burung ku iya, dijual berengka ari rega RM 350 ngagai RM2,000, selampai ari RM 180-RM500, selendang RM500, pua kumbu (saiz 4×9 kaki) pemesai enti digaga ngena ubung asal (engkudu) RM1,500-RM 3,500, (ubung injin) RM2,000 lalu ke di chelup ungkup saiz ke sama RM800.

Ungkup lapik mija ke saiz 2 kaki setengah pemesai enggau 4 kaki panjai ke dichelup nya dijual entara RM350-RM600 lalu lapik sofa ke digaga ari engkudu dijual RM100 siti.

Penerang silik sentang pua kumbu tauka asil pengelandik jari bukai ke digaga Blantau tau ditanya sereta dipeda nengah facebook rornalidam PuaKumbu, tauka rornalidam_pua kumbu tauka email ngagai rornalidam@yahoo.com tauka ditanya terus ngagai anak Blantau, pengajar Rona nengah lumur 013-843 5260. — DayakDaily