Pengawa ngiga orang tuai ke lenyau maya nyarin ikan diketu, bangkai iya udah ditemu

Anggota bomba mengangkat mayat mangsa di Jeti Kapit, hari ini.

KAPIT, Feb 19: Pengawa ngiga siku orang tuai ke diripot lenyau maya nyarin ikan kena Hari Enam tu tadi diketu pengudah bangkai iya ditemu pagi tadi.

Ba penusah ke nyadi kena Hari Enam nyin tadi, nitihka ripot anak iya Sabtu Nur Shafiqa Pelaga Reba, apai iya Reba Gawing, 63 diripot nadai pulai ke rumah pengudah nurun muat jarin ikan di Kerangan Ara, Sungai Balleh ditu.

Pengari Opis Bomba enggau Penyelamat Malaysia (JBPM) Sarawak madah, operasi ti berengkah dipejalaika kenyau dua hari ke udah semina tetemuka perau enggau injin sepit iya ba tebing sungai.

“Taja pia, sehari tu bangkai iya diripot ditemu mensia mayuh urung jam 9 pagi tadi enda jauh ari palan perau enggau injin iya ditemu di Kerangan Ara.

“Raban ngiga enggau nyelamat (SAR) ari Balai Bomba enggau Penyelamat (BBP) Kapit berumban ngagai palan penyadi pengudah berita bangkai ya ditemu diterima,”ku iya.

Bangkai iya dibai ngagai palan penyangkai Kapit sebedau diserah ngagai polis ngambi bejalaika atur ti patut.

Diberitaka, apai tuai nya labuh ari tebing sungai nya tang enda anyut laban gaya ai ba sungai nya ke bepusin ba endur nya. — DayakDaily