KUCHING, Julai 17: Perintah negeri deka nentuka penanggul suntuk ai di negeri tu diputar ambis laun ujung taun 2020.
Menteri Utiliti, Datuk Seri Dr Stephen Rundi Utom madah, isu nya meseti diputar enggau jampat lalu perintah udah nemu chara mutar penanggul nya ti nyadi penanggul besaj ujung-ujung tu.
“Beberapa penanggul udah dikelala nyengkaum suntuk ai, penanggul pemansut ai enggau kualiti ai ke kurung manah.
“Kitai diatu fokus mutarka penanggu tu enggau naka penyampat,” ku iya ba aum media pengudah Aum DUN Sarawak kemari.
Ku iya, kandang menua ke udah dikelala napi penanggul ai iya nya tebing pantai Sebuyau, Samarahan, Pusa, Beladin, Sebangan enggau Kabong.
Penanggul nya ku iya, meseti dipeda sechara holistik enggau komprehensif, sereta diputarka nengah perambu timpuh pandak ti chukup ngasi.
“Kami pechaya penanggul nya ulih diputar nengah pemisi ungkup nelanja ke besai baka ti dibantai Kepala Menteri, Datuk Patinggi Abang Johari Tun Openg lebuh ke ngebas palen nya sebedau tu.
Perintah negeri sebedau tu dah madahka Program Grid Bekal Ai Sarawak deka digaga ngena ungkus RM2 bilion.
Bisi 222 iti projek udah dikelala sereta deka digaga ke mugkur pemansut ai mata, logi meresi, sistem rentayan ngagih ai, nyilih paip, inisiatif ngemoden sereta ngaduka tusun ai,” ku iya. — DayakDaily
