MIRI, Dis 11: Perintah negeri nengah Kaunsil Perambu Negeri udah ngemendarka peminta Gerempung Gerija di Sarawak (ACS) ri dekaka palan ngaga ngaga Palan Ecumenical Kristian Miri ti mungkur pemesai 5.8 ekar di Jalai Miri By Pass.
Sapit Kepala Menteri Datuk Amar Douglas Uggah Embas ngarika Kepala Menteri Datuk Patinggi Abang Johari Tun Abang Openg madahaka berita nya maya bejadika Pengawa Bejalai Bebala Mayuh Hari Krismas di Dataran Kipas.
Nengah teks jaku Kepala Menteri ti dibacha Uggah, penerang nya madah kelimpah mantu institusi jalai pengarap bukai nengah chara nyuaka belanja projek, perintah negeri bela berundingka peminta palan ke tuju jalai pengarap nyengkaum rumah sembiang,pendam enggau peewngka guna nyengkaum aktiviti bukai.
Pengudah palan nya tembu ila, urung 120,000 iku raban Kristian ba kandang endur nya ulih ngaga aktiviti jalai pengarap enggau lantang agi.
Perintah negeri udah ngemendarka 77 peminta belanja ari mayuh bengkah institusi jalai pengarap bukai di Sarawak dalam taun 2017 ti mungkur belanja RM15 juta.
Miri nerima belanja lebih RM3 juta dikena ngaga 12 projek.
Abang Johari ngelalau institusi jalai pengarap ti nerima belanja nya nguna ungkup ke diberi enggau manah.
Unit Ungkup Jalai Pengarap Bukai (Unifor) deka matau projek ti dipejalaika. — DayakDaily
