KUCHING, Feb 28: Kot Federal kemari udah nulak peminta empat individu ti deka “keluar Islam” laban nya ari luar bidang kuasa sida.
Lima akim, Tan Sri Zulkefli Ahmad Makinudin, Tan Sri Ahmad Maarop, Tan Sri Hassan Lah, Tan Sri Ramly Ali enggau Tan Sri Jeffrey Tan udah ngaga pemutus pengudah mendingka jurai ke kedua-dua belah piak kemari.
Ku Sapit Luyar Besai Negeri, Safri Ali madah, kot ngaga pemutus ke alai kes nya patut dipechara ba Kot Syariah.
“Laban ba pekara nya sekalika Kot Syariah tauka Kot Sivil bisi bidang kuasa mendingka kes keluar Islam.
“Ku penemu Kot, taja pan nadai ordinan nyemetak, tang ketegal bisi Ordinan nyemetak Majlis Islam ya nya Seksyen 68, 69 enggau 70 iya nya kuasa ngemendarka rejista ‘masuk Islam’, reti nya mega meri awak ‘keluar Islam’, ba kuasa nya.
“Nyema sida deka majakka kes, sida tau ngemanjaika peminta ngagai Kot Syariah.”
Safri dibantu Luyar Kanan Persekutuan, Shamsul Bolhassan enggau Pegawai Undang-undang Negeri, Hisyamuddin Roslan.
Kes keterubah dipendingka kenyau ari taun 2014 enggau 2015 ti mungkur plaintif indu Melayu Syarifah Norrafyzza Wan Hossen enggau tiga iku ke bukai iya nya Mohd Syariq Abdullah (Ting Choo Ting); Salina Jau Abdullah (Salina Jau) sereta Nur Muzhalifah Abdullah (Jenny Peter).
Keempat-empat sida diarika luyar Baru Bian lalu ngenamaka Majlis Islam Sarawak, Pengarah Opis Jalai Pengarap Islam Sarawak, Ketuai Pengarah Opis Pengerejista Bansa Menua sereta Perintah Negeri Sarawak nyadi responden. — DayakDaily
