PUTRAJAYA, Sept 13: Bisi 14,000 iku ke megai ‘lesen terbang’ di serata menua diberi timpuh sebulan berengkah ari sehari tu nyerahka lisin sida sebarang endur Unit Integriti Opis Perengka Pengangkut Jalai (JPJ) negeri tauka sida deka digiga opis bekuasa nya.
Menteri Opis Perengka Pengangkut, Anthony Loke Siew Fook madah, penerang santang lisin nya tebantai pengudah Opis Nagang Makai Suap Malaysia (SPRM) ngetanka 12 iku pemesai enggau raban JPJ dari Perlis, Perak, Negeri Sembilan, Sabah enggau Sarawak kenyau ari Sept 4 tu tadi.
“JPJ bisi penerang ke silik sentang identiti orang ke megai lisin nya, pemesai JPJ enggau opis pampang JPJ ti ngeluarka lisin nya,” ku iya ba aum media di opis menteri nya ditu sehari tu tadi.
Loke melabaka bisi agi staf JPJ deka ditan SPRM udah tu, seraya madah semua 12 ke ditan sebedau tu deka ditinggang ukum ditanka ari nurun gawa dulu taja pan bedau dituduh ba kort.
“Ukum ditan ari nurun gawa nya diterit ketegal penyalah ke digaga sida nya berat lalu ngambi nyadika ajar ngagai orang bukai,” ku iya.
Ku Loke, modus operandi ngeluarka lisin nya ngena prosedur nukar lisin deriba di menua tasik ngagai lisin deriba Malaysia taja pan orang ke deriba nya nadai kala bisi lisin deriba di menua tasik tauka nemuai ke menua tasik.
“Lesen nya dijual di entara RM2,000 ngagai RM3,500 nengah iklan ba laman sosial. Pemeli semina mayar lalu lesen nya deka dipos ke rumah,” ku iya.
Ku Loke, bisi rayat menua luar ti ngembuan lisin nya tang sebagi besai nya ngaul peranak menua China.
Dikena nambah manah sereta nyeliahka pekara nya ari nyadi baru dudi ila ku iya JPJ deka ngaluska chara ‘conversion’ (nukar lisin deriba menua tasik ngagai lisin deriba Malaysia) lalu berundingka chara ngakun lisin deriba menua luar. — DayakDaily
