LUNDU, Mac 29: Sapit Kepala Menteri Datuk Amar Awang Tengah Ali Hasan nerima geran RM 2.025 juta ngarika 135 pematih baru Tunas Usahawan Bumiputera (TUBE) ari Sapit Ketuai Pemesai Eksekutif SME Corp Malaysia Mohd Rithaudden Makip.
Geran nya diterima ba Pengerami Nutup Program TUBE 5.0 2018 Renggat Negeri Sarawak ba Palan Latih Ke Negara (PLKN) Putra Sentosa, Kem Munggu Belian di Sematan ngambika diagih ngagai kepada pematih baharu TUBE dikena ngepunka dagang.
Tengah ba pengerami nya madah, 245 bisi nembiak Bumiputera Sarawak dilatih dalam program TUBE kenyau ari taun 2014 ti muka 428 peluang kereja lalu mujur ngulihka RM4.93 juta asil jual.
Ku Tengah, 11 gerempung bekaul enggau TUBE ditumbuh di Sarawak ngerichaka bungkur dagang nya nyengkaum Serakup Tunas Usahawan Bumiputera Kenyalang (Kita) enggau Serakup Tunas Usahawan Nasional (Pertunas) ti ngemata program ke diatur ba renggat negeri.
Tengah mega meransang orang dagang TUBE Sarawak ngambika besemekih nyetuk ke renggat global.
Berebak enggau nya, Opis Menteri Dagang Antarabansa enggau Industri (MITI) sereta SME Corp Malaysia dikearap terus mantu nyendiaka duit jalaikelimpah ejensi perintah nyendiaka bemacham bantu nengah ejensi baka AIM, Tekun, Mara, Teraju, SME Corp, Sedc, Midf, SME Bank enggau SPIKS.
Tengah ke mega Menteri Industri enggau Pemansang Orang Dagang madahka opis menteri iya bisi muka bemacham program enggau bantu dikena nulung orang dagang biak baka Arah Keusahawanan (Gerak) sereta Program Usahawan Teknikal enggau Vokasional (Ustev).
Dikena nentuka raban graduate enggau nembiak ke bisi ati ngaul diri ba dunya dagang ke disikap ngena penemu enggau perengka dagang, sida dipinta ngerejista diri ba pusat inkubator Cent@Cube.
Tengah madahka opis menteri iya udah numbuhka Pavilion Produk Sarawak (SPP) di Kuala Lumpur ke nyadi “gateway” produk megeri tu tama ngagai makit Semenanjung enggau menua bukai. — DayakDaily
