‘Pelilih Serian ulih nyadi pemekal pemakai ke pemadu besai’

Manyin (dua kiba) nyuaka tepa ke ngundan produk pemakai ari Serian ngagai Uggah. Bela dipeda Sagah (kanan).

Chris Bishop

SERIAN, Mac 27: Sapit Kepala Menteri Datuk Amar Douglas Uggah netapka Pelilih Serian bisi potensyel nyadi pemekal pemakai ngagai Mengeri Kuching enggau menua bukai.

Pekara nya pia ketegal Serian besemak enggau Mengeri Kuching kelimpah ti mengkang ngembuan mayuh tanah ke tau dikemansang ba pengawa betanam betupi.

“Dikena nentuka Serian ulih ngemujur tanggungpengawa nya, komuniti bekebun di pelilih tu meseti ngalih ngagai chara bekebun moden alai chara tu deka meri pengelebih ungkup sida.

“Kitai dekaka Serian nyadi pemekal pemakai ukai semina ungkup Kuching aja, tang ke serata menua,” ku Uggah.


Iya mansutka jaku nya rambau ngulu aum begulai enggau bala pengari rayat ari Gabungan Parti Sarawak (GPS) enggau bala pemesai ari Opis Betanam Betupi Sarawak sereta Opis Servis Veteriner Sarawak di Serian, seharitu.

Uggah ke mega Menteri Betanam Betupi Moden, Tanah Adat enggau Pemansang Kandang Menua nambah pekara nya seraris enggau juluk Sarawak ti deka nyadi pemekal pemakai ke pemadu besai manggai ba taun 2030.

Ku iya, pengeran nya udah nyadi visyen Kepala Menteri Datuk Patinggi Abang Johari Tun Openg ungkup pengawa betanam betupi.

Kelimpah ari nya, Uggah madah siti woksop endur bejurai sereta nempa pelin besai dikena nentuka potensyel tetiap pelilih menua deka diatur ba awak ke semak.

Woksop nya ku iya nambah deka bejuraika sentang bengkah utai tanam ke engkeman ditanam, sentang pengawa berikan enggau betupi jelu ba tetiap bagi menua.

“Kitai deka nemu bengkah produk ke pemadu manah ulih dikeluarka Serian tajapan kita meratka pengawa nanam nenas, pisang sereta sayur kelimpah ari pengawa nupi chapi, kambin enggau jani.

“Tang semua tu meseti dikereja nengah chara moden ngambi ulih ngemansutka asil ke mayuh sereta bekualiti,” ku Uggah.

Iya pechaya pengawa betanam betupi moden deka mantu nambah penatai pemisi orang bekebun manggai RM4,000 tauka lebih sebulan.

Ba sentang atur ngelaku asil betanam betupi, Uggah madah gerempung orang bekebun ba tetiap bagi menua deka mantu meli asil nya.

“Perintah mega bisi kompeni besai ti ulih meli semua asil nya lalu dijual ke menua luar.

“Tang asil tu meseti mayuh. Enti kitai mengkang ngereja pengawa nguna chara tradisyenal, asil enda umbas nangkup makit luar,” ku iya.

Ngenang kaul ke sama, Uggah madah Opis Betanam Betupi deka nambah penyampau tubuh orang gawa ngambi ulih nentuka semua program ubah ke udah ditusun opis nya ulih dikemujur.

Iya dekaka bisi orang ke landik ba pekara ke bekait enggau buah rian lalu pia mega ba pengawa nupi jelu enggau ke bukai.

“Sida ke landik tu deka ngajar orang bekebun sentang chara ngintu pun rian. Ba pengawa nupi jani enggau chapi, sida tu deka ngajar chara nuchuk jelu ngambika jampat beranak,” tandu uggah.

Bela ngulu aum nya, Menteri Pelajar, Sains enggau Pansik Teknologi Dato Sri Michael Manyin ke mega ADUN Tebedu, Menteri Muda Tanah Adat ke mega ADUN Tarat Datuk Roland Sagah enggau ADUN Kedup Martin Michael Ben. — DayakDaily