SARATOK: Kelab Nembiak Rantau Sukat Brayang Roban bisi ngatur Pekit Main Bol 9 Sepiak Trofi Tan Sri William Mawan ba padang Sekula Primari (SK) Brayang Roban ke deka berengkah kena 6 Oktober tu.
Pom masuk pekit nya tau diambi ba langkau jejaga Sekula Primari (SK) Brayang.
Haribulan ke penudi endar ngerejista tim iya nya kena 5 Oktober, pukul 4 lemai, ti ditangkan enggau pengawa enchabut undi dikena nentuka tusun bemain sereta meri penerang ngagai menijar tim di Rh Jembu Rantau Sukat.
Bayar masuk tetiap tim ditetapka RM150.
Edwar Usang ti nyadi tukang pengerembai berita pengatur pekit madah, semina 16 iti tim keterubah ngerejista diri diterima masuk pekit.
Pekit nya diatur ngena sistem alah mati.
Champion pekit nya deka mai pulai perais mata duit RM1,000, trofi enggau midul, ba lumur dua deka mai pulai perais mata duit RM800 trofi enggau midul lalu ba lumur tiga deka nerima perais mata duit RM600 trofi enggau midul. Kelimpah ari nya, tim ba lumur empat deka nerima perais mata duit RM200 enggau trofi.
Pemain ti pemadu mayuh ngemasukka bol enggau pemain ke pemadu manah bemain mega deka nerima perais trofi.
Sebarang tanya sereta minta pom masuk pekit tau ditanya ngagai Edward Usang ba lumur 012 8477068.
