KUCHING, Feb 28: Sesapa aja pekereja sektor peribit ti dibuai kereja taun tu, sida patut nemu diri dalam kategori tau nerima bantu wang interim nyentuk ke enam bulan enggau bantu ngiga kereja baru.
Pengarah Gerempung Pengelikun Sosial (Perkeso) Sarawak Phillip Sangkan madah, ari baruh Sistem Insurans Pengawa (SIP), pekereja ti diketuka pengaji deka diberi kaunseling pengawa ke setipak.
Bejaku ba Randau SIP di Kuching kena Hari Satu tu tadi, Philip madahka SIP deka nyadi geraga pengelikun ngagai orang ti diketu pengaji gawa
“(SIP) nyendiaka bantu wang ngagai orang ti dibuai kereja nyentuk ke sida mujur bulih kereja baru,” ku Philip.
Ku Philip, penyampau bantu SIP di Malaysia entara ke pemadu baruh iya nya semina 0.4 peratus.
Nengah sistem baru SIP, kedua-dua pengaji enggau pekereja samam ngemansutka 0.2 peratus ngagai SIP tiap bulan.
Ku Philip baru, di serata menua bisi 57,000 pekereja nerima pemaik ari sistem tu taun tu.
Ku iya, kenyau dipejalaika Perkeso Sarawak nerima 76 peminta SIP ari pengaji diserata negeri naka ke diatu ke alai ari Kuching (41 peminta), Sibu (14), Kapit (15) lalu Bintulu (4).
Randau SIP diatur di Kuching sekali tu begulai enggau pengaji betuju nyadung pemadah SIP beserimbai enggau pemandang SIP di serata menua.
Program udah digulung urung 500 iku pesereta baka menijar, pengemeran pengatur pengereja pengawa, gerempung industri enggau ketuai serakup dagang.
Pengudah Kuching, palan nangka nya endur ngatur SIP di Sarawak iya nya Sibu sehari tu Feb 28 enggau Bintulu Mac 8 tu. — DayakDaily
