Pedagang ti enda nitihka SKHMP deka diukum

Grocery store aisle and shelves. — DayakDaily.com file pic. // Photo: Pixabay

KUCHING, Jun 9: Direktor Opis Menteri Dagang Dalam Nengeri, Koperasi enggau Pekara Bebelika Barang (KPDNKK) Datuk Stanley Tan madahka ukum deka diberi ngagai pedagang individu sereta kompeni ti enda nitihka atur Skim Kawalan Harga Musim Perayaan (SKHMP) Hari Raya Puasa 2018.

Skim tu berengkah dipejalai kemari lalu tembu Jun 22 tu.

Bejaku ba aum media sepengudah ngemunka skim ngemataka rega barang ba renggat nengeri di Pasar Raya Mydin, Petra Jaya, Stanley ngerintai penyalah lalu ukum deka dipejalai nitihka Akta Kawalan Harga dan Antipencatutan 2011.

Ungkup penyalah nyual barang rega ti dikemata lebih ari rega maksimum, pedagang ulih didenda nyentuk RM100,000 tauka dijil enda lebih ari tiga taun tauka kededua sekali, tauka mayar kompaun nyentuk RM50,000 ungkup penyalah individu.

Lalu, penyalah ke sama ungkup kompeni nyentuk RM500,000 tauka mayar kompaun nyentuk RM250,000.

Bisi 18 jenis barang pemakai rega ti dikemata di selampur Sarawak iya nya manuk idup, manuk standard, manuk super, telu manuk gred A,B enggau C, dagin chapi import, chabi mirah enggau tomato.

Barang pemakai ke bukai iya nya kubis bunga import, nyiur biji, nyiur parut, bawang mirah mit, bawang putih, bawang besai, ubi kentang import, ikan gembung nyengkaum ikan mabung enggau ikan selayang.

Kelimpah ari nya, ungkup penyalah enda ngengkahka tanda rega bechura kalas, pedagang ulih nerima ukum nyentuk RM 10,000 tauka mayar kompaun nyentukka RM 5,000.

Ungkup kompeni, penyalah nya ulih nerima ukum RM20,000 tauka mayar kompaun RM10,000. — DayakDaily