KUCHING, 29 Ogos: Parti Bansa Dayak Sarawak Baru (PBDSB) minta MP Selangau Baru Bian ngaga judicial review ba Kort Tinggi sentang Seksyen 6 Kod Tanah Sarawak.
Presiden Bobby William nekup penemu Sapit Kepala Menteri Datuk Douglas Uggah Embas ti bisi betimbal jaku enggau Baru bekaul enggau sida sebilik ti udah nerima geran Tanah Seksyen 18 sepengudah tanah sida sebilik disukat nengah Seksyen 6.
“Manah pekara tu ditentuka Kort, ari ti betalat ba media rama.
“Baru patut ngaga judicial review ngagai Kort Tinggi bekaul pekara tu.
“Awak ka Kort nentu ka iya. Sekali ka, Seksyen 6 tu tanah empu Perintah tauka ukai,” ku Bobby nengah surat penerang berita seharitu.
Ku iya nambah, enti saut Kort netapka tanah ti disukat nengah Seksyen 6 tu nyadi tanah ti dipenggi perintah, Perintah Negeri patut meri saut ke semua rakyat menua Sarawak.
Ba penemu kami PBDS Baru ku Bobby, tanah ti disukat nengah Seksyen 6 nya tanah perintah laban empas Seksyen 6 dalam Kod Tanah Sarawak madah ke tanah tu tanah perintah.
“Uggah patut nerang enggau lebih silik agi bekaul pekara tu.
“Ukai semina “politik ai liur” tang tunjukka tanah Seksyen 6 ukai tanah perintah nengah penerang undang undang,”ku Bobby.-DayakDaily
