PBDS enda setuju atur kuarantin di rumah

Bobby William

KUCHING, 9 Jan: Parti Bansa Dayak Sarawak (PBDS) minta perintah nyendiaka palan kuarantin ke engkeman ungkup orang ti datai ari luar Sarawak.

Presiden Bobby William madah, atur netapka kuarantin ba rumah semina deka ngasuh igi penyakit nya ngerekai ba diri sebilik nyema orang ti dikuarantin nya positif Covid-19.

Ku iya, Komiti Pengintu Penusah Ngenyit Sarawak (SDMC) patut berati ka pekara nya enggau silik lalu mutarka penanggul enggau lengkas.

“Baka kuarantin ba rumah panjai, deka meri penusah ngagai diri serumah enggau sebarang temuai bukai ke datai.

“Nya alai, SDMC patut nerangka enggau lebih silik atur kuarantin di rumah,” ku iya nengah surat penerang seharitu.


Ba sentang pemar nyendia hutil endur kuarantin, Bobby madah kuarters lama perintah tau diseruri manah lalu diguna nyadi palan kuarantin tetap.

Bobby mega minta perintah berundingka baru sentang langgur muka sekula kenaka 20 Januari tu.

“Pekara tu meseti diperundingka enggau berat ketegal mayuh bala pengajar ke datai ari Malaya enggau Sabah.

“Raban tu enti enda dikuarantin enggau manah, tau mai igi penyakit ngagai peranak di menua pesisir,” ku iya. — DayakDaily