KUCHING, Sept 9: Siti patung burung kenyalang beumur 65 taun ke diengkah ba sebuah langkau di laman Sepital Palan Pengingat Rajah Charles Brooke (RCBMH), Batu 13 Jalai Puncak Borneo kemari dipindahka ari langkau ke 85 taun didirika dia ke rumah baru iya.
Rumah nya ke baru tembu digaga diengkah ba sepiak Muzium Mini RCBMH dalam kandang sepital nya.
Pengawa miring mindahka replika burung kenyalang nya udah dipejalaika seraban lemambang ke dibai terus ari Lubok Antu, Sri Aman, Sarawak.
Pengawa nya diatur Heritage Society of Rajah Charles Brooke Memorial Hospital (HSRCBMH) sereta dipelanja Opis Menteri Dagang Temuai, Seni, Main Asal, Nembiak Lumba enggau Main Sarawak.
Sekretari HSRCBMH Pauline Menggong madah, patung burung kenyalang nya dipundah laban endur iya ke diatu enda engkeman agi. — DayakDaily
